12.8萬4D梳化　任坐震撼

潮興3D！想睇得再肉緊啲？有無諗過連座椅都變4D，「親身」投入電影的震撼場面？勁Sell親民新路線的華仁影音新舖，今日正式開張，話明放得出嚟嘅影音產品，全部可以攞上手任試，佢哋連價值12.8萬嘅最新4D梳化都話任坐，唔使錢、點解唔試？

記者：許福合
攝影：林栢鈞
Model：Claire@PureModels

梳化跟住電影震

如果你睇3D版《阿凡達》，就已經會嘩嘩聲的話，更要嚟試一試這張D-Box4D梳化，3D係視覺立體，而去到4D就係要有親身「體感」！現場實測，效果直追迪士尼那些動感影院，睇碟時當遇到槍戰或撞車場面，梳化會跟住節奏來搖動，試咗十多分鐘後，留意到主要會向前後左右，及上下郁動，而且隨住聲音嘅力度，梳化搖動嘅力度亦會相應增加，好似有幾幕汽車猛烈撞擊嘅場面，坐在梳化真係有身歷其境嘅感受，有如地震一樣，細膽嘅真係俾佢嚇親，但若然自問膽大過人，更可以配埋3D電視一齊睇，立體視覺再加上真實體感，呢個配套睇碟，先叫真享受！

■睇到撞車場面，真係震過坐過山車！

■使用氣壓推動，睇完成套戲都唔覺熱。

■加個3D電視就組成一個4D動感影院。

■需要配埋D-Box盒仔一齊用。

■碟背有印住D-Box就可玩到。

1-4人齊煲碟

講到全機的靈魂，是一部放在電視底的D-Box機頂盒，作用係將震動節奏數據傳到梳化，除咗硬件要配合外，影碟亦需要支援D-Box，最新推出的Blu-ray或DVD，部份都已經支援，數量還在陸續增加中。
試用時，發覺D-Box主要係根據聲音震動，不過並非有聲音就震咁簡單，主要係聲頻較低嘅聲音，震動頻率會較高及強，例如將低頻如Bass較重，就會享受到更強搖晃，全程有如坐過山車一樣。
睇得咁過癮，梗係想搬返屋企慢慢嘆，全套D-Box價值12萬8千；不過需留意梳化需要另外訂做套在機身之上，華仁影音可按用家居室需要，訂製1-4人4D椅（由$5,000-$15,000）。

百萬豪裝新舖

華仁影音新舖佔地3,600呎，花上過百萬裝修，上去第一個觀感係好舒服！店舖內分為數個區域，各自可試聽試玩到不同類型影音產品，而且各區還安排專職售貨員講解，教埋你點玩！舖內我最深印象，除了4D椅，就要數到一出電梯嘅電視牆，10多部不同尺寸的頂級LCDTV，可以一次過比較吓畫質，喇叭區有喇叭大列陣，亦夠晒氣勢；去到耳機區，可以拎自己部iPhone出來，逐款耳機試聽，找出哪一款最啱自己口味；隔籬仲有隔音房同軟件區，睇啱邊張唱碟、影碟或黑膠碟，都可以拎去試聽。試清楚先入手，就唔怕入錯貨喇！