喺香港政改爛船起錨當日，特區政府上下沉醉喺無名快感嘅時候，一位掌管天象嘅大臣，竟然反高潮潑冷水，對國民嘅前景發出預警。時為6月25日，天文台長發表名為「中國的人口和氣候變化」嘅網誌，預言中華民族已到了危險的時候。
氣候變暖弊多於利
天文台長李本瀅受到天氣女神黃婉曼感召，今期跳出香港，挑戰國家機密嘅底線。台長引述新聞報道話：「中華民族在氣候溫暖時興盛，但在氣候寒冷時衰落。」歷代中國有三個較長時間嘅溫暖期，大致上分別有商朝、東周同唐朝，係似乎相對悠長嘅太平盛世。
天暖國盛，係有根據嘅，因為較溫暖同濕潤嘅氣候有利農業同人口增長。但係呢套理論喺今時今日就未必適用，台長話，近年多處地方氣溫普遍上升，雖然呢個現象可能帶來短期利益，例如農業增產，但係太大嘅升溫未必會帶來好處。
氣溫上升，加上部份地區雨量減少或水源變為枯竭，喺缺乏灌溉嘅情況下會導致土壤水份流失。如要維持目前嘅農業生產效能，就會增加對水源嘅需求，咁樣只會令情況更壞。所以台長嘅結論係，中國氣候變暖，似乎弊多於利，有需要積極規劃、減輕氣候變化嘅影響。