參加三位大教授演講之後嘅飯局，坐在一位年青人旁邊，好奇之下，問一問，原來呢位年青人生於一九八○，還可算是一位八十後，職業係對冲基金公司董事總經理，後生可畏也。與呢位基金Ｈ交談，聽佢由黃庭堅講到王羲之，講到溥儀拿走故宮字帖，被馮玉祥截獲等等故事，不禁奇怪，講英文帶美國口音之年青人，何解對中國歷史甚為熟悉？基金Ｈ話：「實不相瞞，我本來想在大學主修歷史嘅，但爸爸話讀歷史搵唔到食，要我讀經濟，於是入咗普林斯頓主修經濟，但自己業餘時間好鍾意讀中國歷史，對唐宋制度最有興趣，依家想報名中文大學讀比較歷史碩士！」哦，讀經濟可成基金經理，讀歷史可滿足私人興趣，一個人到咗三十歲，可以同時滿足兩種慾望，已算係有成就之人。基金Ｈ又講：「其實讀大學時嘅高深數學、模式，已經忘記得七七八八，投資好講歷史趨勢，一九二九年後嗰段股市大崩潰歷史，極有參考價值，唔識歷史，投資會差少少。」對歷史咁有鑽研之八十後，尤其是在金融界打滾嘅，並不常見，左丁山與基金Ｈ講講吓中國歷史，幾乎技窮，唯有話他日有緣就介紹肥仔Ｋ呢位八十後同佢講歷史講餐飽嘅。八十後呢個標籤，有時用得幾濫，給人一個印象就係社民連擁躉，上街示威嗰一群，幾誤導吓。
在另一個午飯聚會，坐在民意調查專家Ｃ旁邊，問佢有冇做過八十後原型調查，民意Ｃ話冇專門做過，但佢有不同嘅調查發現，八十後並不是香港最憤怒的一群，「社民連擁躉」式嘅憤怒與態度（attitude），只係八十後族群嘅少數，令佢感到意外嘅，香港最憤怒嘅人係中年人，約在三十五至五十歲之間，點解呢個年齡組別嘅人最憤怒？尚待深入研究，目前可以猜測呢班人可能在工作上、家庭上最感受壓力，一來生活擔子最重，二來要照顧父母，並要養育子女，好容易。怎麼樣疏導憤怒中年呢？不如請最有資源嘅中央政策組多多研究吓，組長劉兆佳教授係本港社會學權威學者之一，由佢領導研究，一為神功，二為弟子，最為適宜。