李連杰繼《海洋天堂》後，嚟緊8月會接演程小東執導嘅《白蛇傳》，9月就接演徐克嘅《新龍門客棧》。今次3D版《新》片得到內地電影公司保利博納全力支持，投下巨資3億人民幣製作，演員陣容除咗之前公佈嘅陳坤、周迅同桂綸鎂外，仲加入李連杰演出周淮安一角，戲中佢同飾演風騷老娘嘅周迅會有唔少感情戲㖭。
當年周淮安一角由梁家輝飾演，如今能打動杰仔接演，據聞係銀彈政策奏效，電影公司願支付1200萬美元片酬畀佢，差唔多成1億港元。當年徐克拍攝《黃飛鴻3獅王爭霸》嗰陣，同李連杰鬧不和，後嚟傳出徐克永不錄用杰仔，點知事隔18年，投資《新》片嘅老闆于冬出面促成兩人再度合作，早前佢哋喺北京傾過合作細則，以前唔開心嘅嘢一早抹清。
子丹拒再演公公
至於《新》片另一重角東廠督公角色，聽聞徐克原本想再搵甄子丹嚟演，但子丹呢輪太忙，又唔想重複演同一個角色，最後推辭咗，家仲物色緊人選。《新》片原定今個月中喺北京開機，然後移師甘肅同寧夏，但因為仲有好多技術問題未解決，結果要延遲至9月中先可以開拍。