股票，的確係要用錢才能炒得起，乜鬼價值投資法星俠一向唔太Buy。市場成交偏低，無錢去推，股價又豈會紮紮跳？市況越見陰乾之時，炒家散戶只會一味等，最怕喺成交咁低之下，幕後大戶做嘢更加隨心所欲，若然後市方向唔係散戶玩開嗰邊，咁就濕滯。散戶角色被動，唯一可做係在不明朗市況中，步步為營，唔好隨便落重注，見對辦才加注。
因嫌美國PeabodyEnergy出價35億美元收購太低，中信資源（1205）持有17%的澳洲煤炭企業MacarthurCoal出售計劃告吹，由於澳洲礦業暴利稅會否實施仍有變數，市場分析認為，要再有其他企業垂青，似乎難度幾高。
中信資源年內股價表現麻麻，由年初2.40元水平一直向下滑，跌至1.30元才探底成功出現反彈，但升近1.60元水平又見腳軟；昨日初段表現曾不俗，一度湧上1.53元，但收市前再遇沽壓，平收1.44元，反映高位壓力未消，後市恐要跌穿1.30元，宜等挨近1元邊先撈。
方星俠