以抗爭起家嘅社民連成立至今積聚咗唔少支持者，當中好多係年輕人，佢哋行動一流但理論未必夠前主席黃毓民咁入流，因此社民連都特別為年輕支持者搞培訓班，新近成立嘅「普羅政治學校」7月24日就開學，為期8星期、每星期兩小時嘅課程主要都係針對地方選舉問題，據聞反應好熱烈。
暑假過後亦會有連串課程，教主毓民話會從組織、訓練同論述三方面教班年輕人。辯才了得嘅黃毓民特別講到論述方面會分為兩部份，第一部係同班年輕學員分析吓最新政治生態同形勢，另一個部份主要針對社民連嘅政治綱領同實現目標，換言之都係同班後生仔做好思想工程，希望提升支持者嘅議政質素。