世盃轉入16強爭標直路，協助湖人衞冕NBA總冠軍嘅「足球狂迷」拜恩，上周六就已經去咗南非睇世盃，但佢祖國美國就16強止步輸俾加納；好彩拜恩原來係「花心鬼」，力撐嘅球隊點止一隊咁少，繼之前話支持阿根廷後，原來巴西、西班牙同德國都係佢「最喜歡球隊」，仲話捧德國贏世盃㖭！
兒時夢想做馬勒當拿
31歲嘅拜恩6歲時舉家搬去意大利，到13歲先搬返美國，身處足球氣息濃厚嘅意大利，令拜恩深深愛上足球運動；佢細個最愛意甲班霸AC米蘭，家陣就轉捧西甲勁旅巴塞隆拿。拜恩仲話如果唔係打籃球嘅話，會投身職業足球㖭：「我細個曾夢想自己做職業足球員，覺得自己有日會成為荷蘭嘅尹巴士頓、阿根廷嘅馬勒當拿同意大利嘅巴治奧！」分組賽出局嘅科特迪瓦前鋒杜奧巴，就係拜恩家陣嘅偶像。
講起波經完全唔停口嘅拜恩，周一晚入場睇巴西對智利嘅16強賽事，佢話好期待都係「一剔牌」贊助嘅巴西前鋒羅賓奴有好表現㖭！拜恩講講吓就將自己同人才濟濟嘅巴西串聯喺一齊，佢話：「巴西足球強大嘅程度，就好似美國籃球一樣。如果巴西今次成功封王，就會係歷史性第6次贏世盃；如果湖人下季『3連霸』，我生涯亦會第6次贏總冠軍，所以大家實在有太多相同之處喇！」
為加素力撐西班牙
山長水遠咁嚟到南非睇波，拜恩又點會錯過今晚深夜西班牙對葡萄牙嘅16強賽事；雖然葡萄牙球星基斯坦奴朗拿度（C朗）都係「一剔牌」，但拜恩就講明力撐西班牙「Surewin」！原因係拜恩要支持湖人隊友加素嘅祖家。不過支持還支持，西班牙顯然唔係拜恩心目中嘅冠軍球隊；佢睇好着重團體性嘅德國，之但係德國8強會對佢另一愛隊阿根廷，所以無論邊隊贏，睇嚟「花心」嘅拜恩，最後都會估中冠軍啦！
FanZone
當年今日：29/06/86
阿根廷在領先兩球下，一度被西德扳平，不過貝魯齊加單刀奠勝，助阿根廷以3:2贏波高捧世界盃。
有數講：3
南非世盃16強淘汰美國嘅加納，係今屆唯一未出局嘅非洲球隊，而呢次加納歷史性晉身8強，亦係世盃史上第3支非洲球隊達此佳績；之前嘅係90年喀麥隆，同埋02年嘅塞內加爾。