中銀集團人壽保險執行總裁蔡中虎（左圖）開班授徒？冇錯！不過虎哥唔係教小三學生推銷保險，而係親自教佢哋正面價值觀同工作態度、應該負啲乜嘢社會責任，同佢自己至耍家嗰瓣──領袖才能!
虎哥同班細路講，推銷生意要識得思前度後，一件事物嘅好處同唔好處都要分析清楚，呢班「門生」亦好踴躍發言，仲有人話第時要學虎哥做CEO，因為……可以賺好多錢嘛！
話時話，呢排人民幣保險咁紅，虎哥應該好忙，百忙中仲肯抽時間同國際成就計劃香港部（JA）一齊搞呢個活動，佢話因為自己好鍾意小朋友，仲讚佢哋好精靈，好多嘢一點就明，資質絕對唔輸畀其他國家嘅小朋友㖭！不過，唔知係咪講得太深奧，有細路聽到晒頭，唔知虎哥下次會唔會諗個淺啲嘅課題畀佢哋呢？
李潤芳攝