今屆書展仲有成個月先開始，但係貿發局整個「香港書展文化活動顧問團」就一竹篙打晒一船人，唔畀o靚模兵團宣傳寫真集，搞到一班為搶頭威嘅o靚模頭都大埋，仲一個二個炮轟貿發局同顧問團。噚日新8模去到旺角宣傳就輪住發炮喇，Hidy話今次係借刀殺人，覺得冇人有資格去批評其他人係低俗或者高尚，仲反問係咪喺貿發局掃地就叫高尚。
Mia彈眼光狹窄
Suki就話佢哋本寫真好生活化，唔係刻意性感，都唔係太暴露，仲話顧問團書都未睇過就判斷好奇怪。Hazel就有陰謀論，話今次根本就係冇出寫真嘅出版社眼紅行家生意好，成件事都係商業角度喎。已為人母嘅Mia就理性啲，佢話顧問團咁去評價佢哋，會令時下細路心胸同眼光都狹窄，作為一個家長就應該同小朋友一齊睇，而唔係隔絕咁話。
師妹狂轟大會，師姐周秀娜（Chrissie）就淡定得多，噚日Chrissie喺奧海城出席預防乳癌活動，就用強勁EQ反駁話：「我唔會對號入座，自己唔能夠代表所有人，都係希望啲fans買完寫真見到我啫。佢哋根本就係純粹虛偽，我唔識講，我知佢哋睇番報紙，八千篇報道入面有四千幾篇關於o靚模，如果我係佢哋顧問團第14人，咁樣睇四千幾篇報道，我諗我都唔想見到自己同其他人，佢哋真係好慘。」
