礦產資源股今年整體表現唔算太搶眼，其一講法認為，全球經濟復蘇速度麻麻，故對資源需求放緩，加上不同類別資源行業亦各有問題，好似今年鐵礦石價格已搞到鋼鐵股焦頭爛額。另外澳洲推行資源暴利稅，亦令有礦產項目在該國公司業務添困擾。
講起「袋鼠國」所推資源暴利稅，亦曾搞到在當地有礦業資產的兗州煤業（1171）股價於5月初出現負面反應，由於消息都算突然，拖累兗煤股價從22.4元一直撻落15.52元才能喘定，之後股價出現反彈，重返17元水平。
不過，政治之事一朝天子一朝臣，澳洲總理陸克文下台，市場預計新任政府擬取消所謂資源暴利稅。有關消息當然利好相關資源股，家陣吼位買兗煤，情況就保險得多。
由於內地仍不時有煤礦發生意外，查封之下會令煤炭供應緊張，利好煤價之餘，兗煤亦將受惠。加上澳洲項目亦有助其盈利及產能，故一見兗煤股價調整就要出手買，並作中線持有。
方星俠