天文台預測，星期四7.1當日天晴酷熱，氣溫最高攝氏33度。八方肯定，到時好多人會行到好㷫。天氣咁熱着乜去遊行好呢？唔使擔心，創意爆燈嘅公民社會近日已有多款新Tee設計甚至accessories公之於世，供大家選擇。
費事畫埋華叔
插畫師Cuson設計咗款「民主党建港联盟」Tee，黑底白字，有白鴿黨八位立法會議員嘅肖像，全部個樣陰陰沉沉，中間個白鴿黨徽就crossover中共國徽。Cuson話，6.23開筆畫嗰陣原本諗住畫七個人，當時未有阿涂，諗住佢可能退黨或投反對票，後來真相大白，就加埋阿涂落去；有網民叫佢畫埋華叔，佢話費事。Cuson會集齊網友定單搵人燙，每件估計89蚊，初步已有廿幾人落單。
驚曬嘅朋友，可考慮星屑醫生嘅「忠孝悌」（即係「無信」）cap帽，星屑話除咗白鴿黨徽版，仲有小量特別版，隻白鴿會變成烏鴉，亦可能印小量Tee同場發售。佢話，到時頭戴「民主黨忠孝悌」cap，身着「民建聯禮義廉」Tee，咁就一絕啦。