日漫《聖鬥士星矢》陪伴住唔少70後同80後成長，其中《黃金聖鬥士篇》就係公認最精采嘅一篇，如果將今屆世盃嘅球隊同呢部漫畫結合，相信最初唔起眼，但越打越勁嘅星矢就非亞洲隊日本莫屬。
日本十足星矢有絕招
畢竟，漫畫係圍繞主角星矢嘅青銅聖鬥士，點樣發揮小宇宙而展開。其中天馬座星矢嘅絕招係天馬流星拳，出拳時對手眼中會出現無數拳影，喺今屆世盃，日本都有類似絕招，進攻時成日通過頻繁換位同短傳配合，令對手防不勝防。
天龍座嘅紫龍打得又守得，同本屆世盃先殺入8強嘅烏拉圭好似。烏圭鋒線組合科蘭同蘇亞雷斯，就相當於紫龍嘅絕招廬山昇龍霸。墨西哥有唔錯攻力，但關鍵較量時唔夠堅定，正如漫畫中柔弱、情感細膩嘅仙女座阿瞬。
白鳥座嘅冰河應由巴拉圭飾演，因擅守嘅巴拉圭整體防禦嚴密，又擅於凍結對手。鳳凰座一輝則可能係16強光榮出局嘅南韓。南韓一直以頑強作風同強大意志力見稱，好似「不死鳥」一輝。
好，輪到12個戰力最強嘅黃金聖鬥士。如按星座排列，最似白羊座穆先生嘅係打法飄逸、換位頻繁嘅葡萄牙；而剛猛十足嘅美國，就係金牛座嘅阿魯迪巴。前冠軍嘅法國，喺今屆賽事由於內部分裂而出局，一如漫畫中實力強但有雙重性格嘅雙子座撒加。
第4宮嘅巨蟹座迪馬斯古係黃金中實力較弱嘅一個，同爆冷入8強嘅加納一樣。獅子座嘅艾奧尼，唔使問一定係「三獅軍團」英格蘭。第6宮處女座嘅沙加係12宮中威力最強嗰個，同實力傲視群雄嘅西班牙不謀而合。
荷蘭瓣數多似天蠍
第7宮天秤座係聖鬥士中資歷最高、實力深不可測嘅童虎，試問呢個角色除咗5屆冠軍巴西，仲有邊隊勝任？第8宮天蠍宮，應由「橙衫軍團」荷蘭鎮守，荷蘭進攻瓣數多，同天蠍座美羅嘅絕招深紅毒針好似。
射手座艾洛斯嘅攻力集中喺黃金箭上，而阿根廷隊嘅攻力，就係集中喺美斯、希古恩同泰維斯身上。山羊座嘅修羅就係智利；水瓶座嘅卡妙冷若冰霜，一如講求機動及效率嘅德國。雙魚座嘅阿布羅狄最貪靚，就一定係意大利，因兩者都係「得個殼」。