一班專家學者出席金融講座，演講之後，到就近酒店吃午飯，左丁山趕唔到時間聽演講，只能參加飯局，見到銀行董事A笑到o架o架聲，原來講緊政改方案，金融飯局，唔係應該講吓人民幣匯率、歐洲債務危機嘅咩？但適值是日曾特首召開特別行政會議，商量民主黨之「改良方案」，於是在座人士講政改突破性發展嘅興趣非常濃厚。
董事A話：「我贏晒，贏咗好多餐晚飯，食到八、九月都食唔晒。我早就話政改方案會得到四十票或以上，在立法會通過o架啦，個個都唔信，同我輸賭一餐晚飯。嗱，家我可以割禾嘞。」立法會能否通過政改方案，直至六月十七日都係悲觀嘅噃，董事A憑乜同人輸賭咁多餐晚飯？董事A話：「心水清啫，當初公民黨社民連話要搞公投，民主黨華叔與黃毓民鬧大交，民主黨唔肯加入五區總辭，我就覺得泛民一分為二，一派講鬥爭，另一派當然會走妥協路線，既然如此，我就認為民主黨同阿爺有偈傾，傾唔傾得掂係由阿爺話事嘅啫，主動權在阿爺手上，而達成妥協，對阿爺冇壞嘅啫，泛民點都起唔到飛腳，故此我覺得阿爺為咗分裂泛民，最後會讓少少步嘅，政改方案咁就得咗啦。」
現在講，道理十分簡單，但在幾個月前講，真係要有啲諗頭兼眼光至得，抵董事A贏晒咁多餐飯。民主黨成為第一大溫和民主派，社民連成為第一大激進派，毓民自言在中大收o靚，成績甚佳，於是下次選舉，兩黨旗幟鮮明，互爭雄長，但公民黨呢？與社民連走在一起，唔識講粗口，唔慣嗌口號擲蕉，叫得做大狀黨，爛得去邊呀？講政治妥協，公民黨又幾僵硬噃，與民主黨傾唔埋欄，於是兩頭唔到岸，怎麼是好？下次直選，好難拉票，尤其是湯家驊，既參加普選聯，又違反投票默契，走晒精面，你估新界東選民盲嘅咩！仲有一位鄭家富，亦作如是觀，左丁山認識一批沙田選民，佢哋都話2012年投票俾晒劉慧卿，以示支持！