小妹有幾年冇去上海，前一排再去，驚覺真係唔少地方變得靚好多，但慢慢發覺唔識行路，因途人永遠會逼埋嚟；排隊嘅時候，隊後面嘅人總會貼住自己背脊，原來係避免出現空位，俾人打尖攝入嚟。
公司車服務較佳
喺上海最痛苦係繁忙時間截的士，隨時等成30分鐘，小妹就試過等45分鐘，想搭地鐵又停咗。當地繁忙時間好多，包括朝早上班、中午食飯、中午食完飯、下班、食晚飯、食晚飯後，周末仲要加埋落club前、落club後……
同港龍中國華東地區經理任梓文（Wilson）呻開，佢話幾辛苦都唔好亂截的士，因為上海的士有分公司車同私人車，公司車係幾間大公司包括大眾、錦江同巴士（係，巴士公司嘅的士）等，司機都訓練過，有問題可以投訴，相反個體戶難保證，Wilson話連佢啲上海同事都未必敢搭，「遊客有事仲難求救，費事麻煩啦。」
公司的士車頂燈箱會顯示公司名，車牌亦有分別，公司的士車牌頭兩個字多數係「滬A」同「滬B」，但私人的士就係「滬X」。喺上海，的士司機表現好會獲頒星星，試過坐三粒星的士，司機零舍好禮貌。
仲有，除非你要去好出名嘅地方，否則唔好淨係同司機講想去嘅街名，要講埋同邊條街交界，例如「西藏中路、威海路交界」就會好穩陣，否則多數會去錯o架。至於去世博參觀嘅，不妨試吓call世博的士。
電郵：mailto:[email protected]