警方上星期圍住立法會大樓佈下叫BoxFormation嘅鐵馬陣，八方同事當日現場數過，單係立法會大樓外，同皇后像廣場一帶，已經有1,200個鐵馬，仲未計中環其他地方好似政府總部同禮賓府附近街道嗰啲。八方問PPRB，究竟警方當日總共出動咗幾多個鐵馬、佔全港警方鐵馬總數幾多、買新鐵馬用咗幾多公帑等等。
警方嘅回應居然係：「鐵馬乃常設的裝備，我們會配合行動的需要，不時更新。至於涉及行動部署及安排的細節，我們不作評論。」家連鐵馬數字都係行動機密，警方透明度真係高！八方相信，呢款鐵馬陣定會成為警方對付示威者嘅新武器，因為示威者好難越過，而且用鐵鏈同索帶扣實，成排勁重，根本好難推郁或拎開。