李老闆：馬交文，幾日冇見去咗邊度威？
馬交文：我馬交有個葡萄牙血統嘅老表，之前就叫我過大海，一齊睇葡巴大戰，仲安排咗幾晚5星級酒店房，盛情難卻，咪同老婆去咗馬交幾日囉。
收銀妹：葡萄牙點解喺澳門咁紅？
李老闆：都叫咗你平時睇多啲新聞，澳門未回歸前係葡萄牙殖民地，就好似以前香港由英國管咁，香港人好多都捧英格蘭，澳門街就好多葡萄牙粉絲。
馬交文：係o架，葡巴大戰嗰日，成個澳門街靜英英，唔係老表搵定酒吧，要搵個位睇都幾難。雖然場波悶悶哋，好彩葡萄牙都出到線。
李老闆：話時話，好在最終西班牙、葡萄牙呢啲強隊都出到線，對我哋生意都冇咁大影響。馬交文，有冇中番場波贏番啲手信錢？
馬交文：冇呀，美國對加納，我就捧美國，好彩馬交個邊早盤開平手，最後1:1走盤，如果喺香港，仲要輸半個㖭。
外賣仔：聽晚就有大戰喎，西班牙對葡萄牙，你又捧葡萄牙？
馬交文：你當我儍o架，我老表就係半個葡萄牙人啫，我就係理性中國人；睇完葡萄牙對巴西，巴西咁hea，葡萄牙都冇咩優勢，西班牙上仗贏智利夠清脆，呢場波冇得打，西班牙surewin。
李老闆：咁好心水，聽晚會唔會過澳門睇先？
馬交文：夜麻麻都係唔好走嚟走去，留個位畀我啦，李老闆。