橙天嘉禾（1132）係龐大內銷市場受惠者之一，值得實。橙天主打電影發行及亞洲區經營影城。2010年首季度，橙天純利升咗5.6倍，到3300萬元人仔，業績已經好省鏡。仲要咁睇，參考好似花旗國等成熟市場，單係08年，地區總票房收入高達89億美元（約610億元人仔）。祖國市場方興未艾，到上年嘅票房總收入，講緊都係60億元人仔。所以，只要消費潛力進一步釋放，可以不得了。再講，橙天本身亦計劃喺2012年底前，在祖國增設銀幕到420個，食住呢股龐大內銷潮，橙天可以好肥仔。
好保守計數，橙天2010年及11年度純利，按年增長40%計，兩年度純利1.34億元及1.88億元，2011年度PE都係得11倍。呢轉先上望15倍PE，橙天都要升近30%到1.1元。
接近底部天業1蚊可吸
新疆天業節水（840）係環保國策受惠股，但一樣照跌，短短兩個月，跌咗近4成，趁挨近半年橫行區打底，可以諗諗。天業最新NAV是1.45元，現價1.08元，折讓近26%。同類A股，全部無折讓未止，PB全部上企兩倍樓上，天業係最平嘅節水概念股。呢轉實個橫行底1蚊，天業跌到呢個水位兜一轉，短打博升20%到1.2元，都未有耐上到NAV水位。
錢雋