家卡拉OK業競爭好大，Neway嗰頭吞併加州紅做龍頭一哥，BMA老闆、南華班主羅傑承呢頭一擲五億開K場。Neway為保持競爭力，花咗近千萬元將旺角艦店NewayCity重新裝修打造成百變K房，86間主題房間間唔同，講到最浪漫當然係星空魚缸房。
亦顧及中產客
小妹入到魚缸K房，抬頭睇見整個天花板星光閃閃，銀河下配置發光長形魚缸，缸內幾尾魚悠然自得蕩來蕩去，嘩，唱K都可以唱得好sweet。人稱強哥嘅店舖經理朱焯強話，啲客要求越嚟越高，要畀人新鮮感，「呢度分兩層，一層K房設計走年輕人路線，一層走高格調吸引中產客。」
強哥話，年輕機迷最鍾意梗係PS3FinalFantasyXIII主題房，全亞洲只此一間。其他特色房仲有帆船房、北京鳥巢房、羅馬教堂房等。其中最浮誇嘅Party房，面積逾400呎，牆上邊仲有兩幅《清明上河圖》浮雕，「呢間係旺角最大K房，坐到50人。」
電郵：mailto:[email protected]