舊事重溫，05年鍾欣桐（阿嬌）和方力申把臂同遊瑞士遭識穿，被迫前後腳出閘掩人耳目，其後這段戀情無疾而終。沒有小方的阿嬌還有個陳冠希，08年爆發淫照事件，阿嬌形象插水，連累07年作品《出水芙蓉》淪為雪藏品，最近終於解凍浮出水面，為此舊情史再度翻開。小方踢爆阿嬌曾自信盡失，拍劉鎮偉電影《越光寶盒》時不敢抬頭望人，小方更後悔沒在淫照事件發生時給阿嬌支持與安慰，但阿嬌體諒地說：「我冇怪過任何人，好少有人夠膽回應呢件事。」 撰文：魯萍
《出水芙蓉》上映日期：7月15日
因為阿嬌淫照事件，令電影《出水芙蓉》石沉大海，方力申說從來沒有將責任推到阿嬌身上，他日前接受本報記者專訪時說：「做宣傳呢段時間，知道佢生活係點，導演（劉鎮偉）都知道佢嘅故事，我好佩服阿嬌，比起發生事之前，家佢出奇地有自信、獨立，表達能力強咗，導演話佢拍《越光寶盒》第一日開工係耷低頭唔敢望劇組嘅人。」
「後悔冇畀鼓勵佢」
小方坦言後悔沒安慰阿嬌，他說：「我有少少後悔，佢經歷咁多事，嗰兩年最痛苦嘅時刻，作為朋友冇畀佢安慰同鼓勵，用藉口同自己講人哋咁煩唔好打搞人，其實可以做好啲做多啲，但家對住佢又講唔到呢番說話。」
曾幾何時，小方可曾想過和阿嬌將一段感情發展下去？他避重就輕說：「冇諗過，娛樂圈成日傳藝人私生活有幾多姿多采，講到入娛樂圈唔係做戲係為識女仔，我工作還工作，拍戲時對對方有好感係會有，但未去到拍完戲要做我女朋友。」
與前緋聞女友合作演情侶，小方不覺得尷尬，還指知道是和阿嬌拍檔，即二話不說接受了，他說：「新聞還新聞，都睇兩個人相處，同已經認識嘅朋友合作更加有默契，我好珍惜呢次合作機會，如果為兩餐要同唔鍾意嘅人合作就冇計，我哋本身關係一直keep得好好，可以傾訴心事嗰種，不過未試過，我冇乜心事需要搵人開解。」
阿嬌得知小方剖白後悔心聲後，曾有一瞬間流露出激動的情緒，但很快就平復心情，她說：「我又冇話怪任何人，呢啲都係自發性，可能唔方便呢，因為好少有人夠膽去回應呢件事，佢費事，其實佢好關心我，可能佢有自己諗法，作為朋友適當嘅關心就夠，有啲問候係存心八卦我亦會睇得到。」
阿嬌：人生小插曲
被踢爆在片場不敢抬頭望人，欠缺自信，在這過渡時期，阿嬌一度變得較親和，問她如何挽回自信？她說：「第一日開工拍《越光寶盒》，我同導演講太耐冇拍戲，唔記得點做，導演話我儍女，叫我唔好亂諗，係導演畀番信心我，嗰時學跳舞驚到要戴帽，覺得同人眼望眼需要好大勇氣。我同自己講要面對人之前先要面對自己，第一步由安全地方開始再面對唔識嘅人，心諗情況都壞到咁，唔會再衰得去邊，決定除低頂帽去面對人，再慢慢重新建立自信心，個人開朗番，唔再多愁善感，將唔開心嘅事忘記晒去。
「經歷咗咁多事，開心同唔開心都係人生小插曲，之前去過兩次四川探訪，發覺原來比起我不幸嘅人仲有好多，反思自己呢件事唔算係乜，每個人都希望人哋畀機會自己同接受自己，好開心有人畀呢個機會我。」
阿嬌：劉鎮偉叫我唔好放棄
鍾欣桐在落難的時候，經常頭耷耷不敢面對人，她表示要感激導演劉鎮偉的鼓勵，因為這次的合作還建立了一份父女情誼，她說：「好似多咗個爸爸咁，佢抽時間陪我食飯，講佢經歷過一無所有，家佢係一億票房導演，佢叫我唔好放棄，要相信自己，唔踏出第一步就冇第二步，唔出左腳點行右腳？」
小方：我冇咩？
問阿嬌那小方有否給她一點鼓勵？阿嬌望向小方反問：「你想我點答？」小方帶點怪責的語氣說：「我冇咩？」阿嬌有點受威脅說：「咁有嘅！」
故事簡介：一秒鐘愛情
《出水芙蓉》故事發生在長洲，阿嬌為了向情敵報仇，決定參加游泳比賽。時間緊逼下，她將飛魚王子方力申綁架到長洲，充當其私人教練，因而日久生情。導演劉鎮偉的愛情故事往往言之有物，而且不會放過每次玩老朋友王家衞的本色，今次講的是一秒鐘的愛情，擺明衝着老友《阿飛正傳》的一分鐘愛情而來。
化妝：YanchiuofMake360.com.hk（阿嬌）、YenLai（小方）
髮型：DanielofChinG（阿嬌）、VincePangofIlColpo（小方）
服裝提供：Izzue、Vanilla（阿嬌）、People'sMarket（小方）
場地提供：HarbourPlaza8DegreeLimited