十年前的電影《鎗王》，將鎗的鋒利拍得淋漓盡致，今日爾冬陞再拍《鎗王之王》，他表明沒有情意結，今次找來兩個靚仔古天樂跟吳彥祖演出，古仔演繹的鎗王，殺掉匪徒，救回警察，因而惹起極大爭議。電影上映日期正值世界盃高峯期，爾冬陞無懼場中22人，他說：「要驚不如驚馮小剛套《唐山大地震》。」說得夠確實夠坦白，證明天災果然可怕過人禍。 撰文：何永寧
《鎗王之王》上映日期：7月1日
「世界冠軍都冇兩個主角靚仔」
導演爾冬陞（小寶）一再強調電影《鎗王之王》並不是由他監製的《鎗王》延續，故事發生純粹出於一項假設，他說：「故事構思喺10年前拍完《鎗王》，當時多謝一班警察同律師朋友幫手畀料，所以搵佢哋出嚟食飯，其間忽然諗到，既然比賽支鎗威力咁大咁準，鎗手技術又咁好，如果咁樣撞到打劫，用嚟對付班賊咪好犀利？班警察朋友話千祈唔好制，因為個鎗牌只可以畀喺指定地方用，如果咁樣做，個鎗手一定一身蟻；但係班律師朋友話唔係喎，有得打，既然有得拗已經可以有嘢講。」
小寶於是構思剛去完實戰射擊比賽得到冠軍的古天樂，在回家途中遇到持械匪徒打劫解款車，最後以出賽用的手鎗將歹徒擊斃，他說：「除咗鎗戰場面，仲會有法庭戲，係幫助劇情推進，但就唔會拍太長，如果唔係套戲會變成《壹號皇庭》。」
畫鬼腳串連角色
小寶表示如果硬要將這部跟10年前的作品拉在一起，就是方中信的角色，他說：「你可以獨立睇呢個人，但如果聯想番佢係《鎗王》出現過苗志舜嘅角色亦可以。」事實上方中信雖然屬客串性質，但那一場代入兇徒角色去思考的戲份演得實在出色，而類似的手法在《鎗王》中也曾經運用。
小寶透露整部電影都建基於商業考慮，他說：「個戲名已經好商業，一睇就知套片賣乜嘢。另外喺開場嘅實彈射擊賽亦都誇張o架，原來嘅場地冇咁大，選手亦唔需要走動咁多，好多世界冠軍都係大肥佬，當然亦都冇兩個主角咁靚仔。」
戲中涉及的法庭戲及心理分析等也加入不少電影元素，小寶希望入場的觀眾能夠一聽就明，他說：「呢套係商業片，所以話有乜講畀觀眾聽？係冇嘅。盡量做到易明，反而人物角色安排上會花多啲時間，戲味會重啲。當初同兩個編導度嘢時候，要用畫鬼腳方式將佢哋串連埋。」
要講較特別的，反而是古仔跟吳彥祖（Daniel）的角色安排，小寶補充說：「古仔演一名喺美國讀完心理學，返香港之後做基金經理，吳彥祖就係高級督察；兩個人都鍾情實戰射擊。有人覺得Daniel喺外國長大，做古仔個角色咪仲似，我話似咪唔好玩囉，調轉先有戲做。」
唔驚世盃怕小剛
電影安排在7月上映，瘋魔全球的世界盃正舉行得如火如荼，不過小寶謂這不是考慮之列，反而是另一導演馮小剛的作品更令他上心，他說：「今次主要考慮嘅係內地市場，內地市場嘅酒吧文化冇香港咁犀利，始終大陸咁多人都會有人睇戲。你話擔心，不如驚馮小剛套《唐山大地震》7月22日喺內地上映，驚佢仲多過世界盃。我之後有套監製嘅電影都係避佢，擺喺佢之後上，你都可以話夾住佢打o架。」
小寶表示當今香港的電影無可厚非要依靠內地市場，但港產片暫時仍有一定優勢，他說：「好多今日入戲院睇戲嘅觀眾都係睇港產片長大，呢套《鎗王之王》係好典型嘅港式電影，自然會有捧場客，而且近年好多華語片都係古裝片，時裝會有一定吸引力。」他笑言數就是如此計，但結果當然要票房出來才清楚。
「我會愛上對手吳彥祖」
人有時不怕選錯，怕的只是沒有選擇。在女人面前抬不起頭，更是男人不能承受的打擊。電影中古天樂正承受這兩樣痛苦，他周旋於舊愛蔡卓妍（阿Sa）及新歡李冰冰之間。後者令他又愛又恨，戲中古仔對她講的一番話發人深省，古仔說：「我揀乜嘢你都話唔啱，乜都話錯，我錯你咪由我錯囉，我想要番男人嘅尊嚴。」最後當尊嚴再受挑戰時，他不惜賠上生命也要錯下去，是男人悲劇宿命。
接受嚴格訓練
相對《竊聽風雲》中演的老差骨，這次古天樂飾演的金融才俊有更多的內心交戰，令人聯想起10年前哥哥張國榮演出的《鎗王》。古仔謂兩者沒有任何關連，唯一貫穿兩者的只有方中信演的角色苗志舜。他認同男性有時明知錯也沒有選擇，他說：「睇過《鎗王》嘅都明白哥哥知自己錯，想過用鎗自殺，但有時明知錯都要錯落去，男人係奇怪嘅動物。」
古仔認為觀眾最期待應該是他跟Daniel的鎗戰對決，但自己反而鍾情於兩人的心理戰文戲，他說：「我哋會透過誘導對話，希望知道對手諗緊乜，拍到最後我發覺戲裏面了解自己嘅唔係李冰冰同阿Sa，反而係Daniel，如果戲裏面佢係女人，我應該會愛上呢個對手。」
古天樂為做好神鎗手的角色，在拍攝前專程到射擊訓練學校及鎗會，接受嚴謹的訓練，古仔說：「男仔玩嘅鎗係由細到大嘅玩具，以前唔知真鎗有幾大威力，今次試過實彈練習，接觸唔同訓練，發現好多鎗嘅威力比我想像中大，而來福鎗原來發射時，可以係冇聲，殺人於無形。」古仔試過在一天內開過所有款式的鎗枝，每支開十多廿發，一次滿足他童年射擊夢想，古仔說：「雖然練鎗只係打靶，但係感覺都好震撼，好多鎗火力強大，連兩隻手都揸唔穩。」
對於是次飾演射擊高手，古仔表示未開拍已感到很大壓力，他說：「因為所有行內人都知，拍戲嘅手鎗雖然唔係實彈，但係仍然會有流彈同走火，流彈嘅碎片有殺傷力，大家都有心理準備，好彩冇意外發生。」
500發流彈橫飛
古仔透露其中一場群戲，十多名演員參與鎗戰，一刻間眾人發射近500發，煙火四起，流彈橫飛，古仔說：「事前已經知道拍攝危險，我哋每日拍戲都有拜神，好彩冇發生意外。」雖然對射擊甚大興趣，但古仔表示不會考慮考取鎗牌玩實彈射擊，他說：「自己好少機會玩，而且玩鎗消費好高，每發彈分分鐘要幾蚊，簡直係燒銀紙。」
採訪：張俊銘
場地：香港銅鑼灣皇冠假日酒店
化妝：CarmenMan
髮型：DanTamof04
張國榮嗜殺成狂
看到新作中的方中信苗Sir的角色，不難回想10年前他跟張國榮在《鎗王》中，兩人在戲院中的一場西部式對決。《鎗》片講述張國榮跟任職警官的方中信同是實戰射擊的高手，並認定彼此為挑戰的對手。一次比賽中一名精神異常的男子持鎗闖入，張國榮被迫開鎗制止。他用鎗初嘗殺人的快感後不能自拔，自此成為一件殺人工具，引發戲院一幕張死在苗Sir鎗下，而《鎗》片也成為鎗械片的經典。
電影簡介：殺匪救警 雙雄對決
導致7死1重傷的四億美元債券劫殺案，轟動全港：但案件爭議的地方，是將匪徒鎗殺而救回警員性命的，竟然是一名市民──四屆實戰射擊鎗王關友博（古天樂飾）。當大眾激烈討論這位「救警英雄」是否應判殺人罪時，律政司決定起訴對方，引起輿論及公眾極大迴響，負責調查的警官莊子維（吳彥祖飾）也感到無可奈何。不過在盤問過程中，古天樂的某些行為對話引起他的疑心，莊子維決心追尋其過去，發現一切事情的發生並非巧合，步向真相，促使兩雄對決。