BACKFLIP後空翻登場　"R"背脊TouchPad

除咗HTC密密出Android手機，Motorola亦係死心塌地咁打算靠Android翻生，繼MILESTONE成功後，再度出擊，推出一部識玩「後空翻」嘅BACKFLIPME600，鍵盤可反摺隨時變身座枱式手機，仲可以替佢搔背脊！

記者：許福合　
攝影：周旭文

變身鬧鐘

第一眼望落ME600，同一般手機無大分別，儘管3.1"觸屏在手機市場上較少見；其實ME600焦點，落在內置鍵盤上，以往滑蓋式鍵盤手機見得多，倒楣嘅仲可能被夾過手指，ME600鍵盤從後翻過來極之順暢，對用家手指有較佳保障之餘，當掀至大約45度，更可平放在枱面，變成座枱式，用來睇片或做簡報都幾好用。當閒置一段時間，佢仲會變成鬧鐘模式。
除咗Touch芒及鍵盤，屏幕背後仲有個觸控板Backtrack，拿着手機，亦可以用手指在觸控板滑動控制，想法就幾創新，不過總覺得在機背操作，唔及Touch芒咁直接又方便。

■機身雖然有埋鍵盤，但厚度僅15.3mm都算薄。

■當合上鍵盤後，鍵盤就會變成機背。

■500萬像素鏡頭連閃光燈，放在鍵盤較少見。

1.5版Android

近期新Android手機都以2.1版出廠，ME600竟然仍然係1.5版，令人意外！可能Moto都覺舊OS有啲Out，所以操作上更花心思，如加入好多Moto手機都內置嘅雙麥克風噪音消除技術，同時亦改進Android在播放YouTube影片時，變得更順暢，亦具備全面藍芽傳檔功能，分享相片音樂就更容易。ME600有500萬像素相機，鏡頭特別之處係放喺鍵盤上，咁就可以配合鍵盤調校角度，影人或自拍都更方便，影完相仲可作亮度、裁切、色調等編輯，及上傳至Facebook等社交網站。總括嚟講，感覺ME600操作比預期爽快，鍵盤順滑度亦值得一讚，但按鍵未有凸起，打字手感就差咗啲。