唔講唔知，港龍航空原來成立咗25年，比小妹仲大一歲，首航係85年7月26日由香港飛去馬來西亞嘅阿庇。行政總裁唐偉邦（James）噚日向小妹介紹佢哋一連串嘅25年周年優惠活動，最吸引嘅梗係買機票送機票啦。
James話港龍今年嘅載客量已回復08年金融海嘯前嘅水平，加埋25周年，當然要回饋吓乘客。
下月26日網站訂票
下月26日凌晨至27日凌晨1點共25小時內，顧客經www.dragonair.com訂購今年12月31日或之前出發嘅任何機票，每第25、50、75個（如此類推）網上訂票嘅顧客，就會獲得同等價值嘅機票現金券回贈，「每次訂購機票數目最多六張，如果你係第25個訂票嘅客，就可以回贈所購六張機票總金額嘅機票現金券。」
7月1日至9月30日喺港龍航機購物，每滿500蚊可抽獎一次，贏取價值3.5萬元金飛機，每月會送一架；7月26日喺機上買任何產品，就會獲贈CalvinKlein香水一支㖭。另乘搭指定航班仲有免費送25周年特別版Haagen-Dazs雪糕、奇華迷你曲奇同鳳梨酥。
港龍機艙服務總經理Cecilia話，新一季有65種全新機艙產品發售，包括25周年無線飛機滑鼠（$270）、波爾多都柏莊園1985年紅酒（$1170）等，仲有同住好啲合作推出信箱名片盒精品，「機上仲首賣兩公斤裝日本越光米，免費送上門。」
電郵：mailto:[email protected]