今年10月10日西九會出現奇景,因為有項RedBullFlugtag(德文解飛行日)活動,首次喺亞洲搞,參加者會四人一組,設計同製作翼長唔超過9米嘅飛行器,比賽日會先嚟個10幾秒嘅表演,然後由6米高嘅跑道飛向維多利亞港。
大會規定架機唔可以有摩打,唔可以係滑翔機,咁點飛呀?冇錯,多數飛唔起。睇以往比賽片段,設計搞鬼嘅飛行器,多數係跌落海。發言人話比賽着重創意搞鬼,但最遠都有人飛過60米。
頭獎可以學揸真飛機,二獎去澳洲睇飛行特技,三獎幫你搞個party。上網報名 http://www.redbullflugtag.hk,大會畀埋地方你,兩個月內製作飛行器。