娛樂圈近年勁出巨B，李樂詩（Joyce）的兒子Maxton8個月大已有22磅，Joyce話平均兩星期就要幫他買新衫，現時已經要着2歲尺碼，出街成日被人話係XLBB。不過Joyce話會同囝囝Keep住做運動，保證巨B唔會變肥B。
記者：林佩婷
相片由被訪者提供
鳴謝：CasaLisboa（29051168）
5個月大吃8安奶
Maxton出世時只有六磅多，但到了3、4個月開始，一下子增磅超過一倍，5個月到現在達到22磅，要知道一般是18磅左右。Maxton一出世的胃口非常好，普通BB可能每三小時才飲一次奶，但他約兩小時就肚餓。不但如此，每次份量也很厲害，難怪短短時間就增磅迅速。「工人一聽到佢係咁喊，就知要餵奶。咪以為餵得少先快肚餓，佢胃口不知幾大，好似普通可能食4、5安奶左右，佢5個月大就差唔多食8安。縮短飲奶時間份量又多咗，可能因為咁變得咁大隻。」Joyce都曾經諗過好不好給少一點奶，但若飲唔夠，阿仔絕對喊到收唔到口，一定要食飽飽才收聲。
碌跑跳玩住KeepFit
短短3個月左右，Maxton由6磅幾一躍跳升至14、5磅，Joyce有時都有想會否太肥，老人家甚至警告小朋友將來會變癡肥，最初她都有點擔心，但醫生就着她不用擔心，因為到小朋友識行識走自然瘦。雖然如此，但Joyce亦定時和Maxton運動一番。「細個我會抱住佢喺床度不停咁跳、碌嚟碌去，幫助消耗卡路里。到家大啲就俾佢坐學行車，等佢跑住嚟同我玩捉迷藏。每到外地我都會同佢去游泳，呢排都有朋友同我講囝囝個人拉長咗，無咁節瓜人。」現時除了飲奶，Joyce亦經常自製紅蘿蔔、肉類等糊仔讓囝囝擦餐飽。
巨B有風險
雖然BB肥嘟嘟好可愛，但原來無論在懷孕時又或成長時成巨B，對孕婦或BB本身都有一定的風險。婦科醫生靳嘉仁指若在懷孕時BB估計到有重磅情況，很可能由於遺傳或患有妊娠糖尿病等原因。在生產過程難產機會會較高。因為生產時很容易因擠壓而缺氧導致剖腹生產，若不幸因擠壓過度以致腦部嚴重缺氧，就有智能受損或死亡的風險。而媽媽因懷巨B發生手術或產道擠壓創傷，又或生後因子宮肌肉收縮無力導致大量出血等情況。
至於出世後如何界定為巨B，兒科醫生張傑就指體重超過4公斤便算巨B。由於有部份是因為媽咪懷孕時有糖尿病以致BB吸收太多糖份，故出生後可能導致血糖過低、增加血液濃度。要慢慢幫BB減磅的話，可以減少奶量或開稀奶，若未能減食的話也可以順其自然，於1歲後身體也會根據個人遺傳因素而改變身形和體重。
