近年躋身才女的鄧麗欣(Stephy),除了喜歡以文字及畫畫來抒發個人情感外,最近更愛上攝影,不過她一如其他女孩子般,抗拒拿着如磚頭般重的大機四圍去,Stephy獨愛以Lomo及Ricoh數碼相機四處隨影。Stephy喜歡以人物及風景為主,她很少自拍,Stephy直言自己經常成為拍攝對象,故私底下她反而喜歡拍攝其他人和事。
Stephy影相一切隨心隨意未有刻意經營,她謂:「我覺得相片係留低記憶嘅最好方法,可以好直接表達好多嘢,同埋以唔同顏色以及唔同角度去睇,自會有唔同嘅感覺出現。」 撰文:麥佩儀
魚眼看世界
「呢張相係我喺上海坐車塞緊車時影,我好鍾意用Lomo影相,覺得影出嚟變咗形圓圓哋,所有嘢都好似好得意咁。」
偷影小o靚模
「我去到外國好鍾意影小朋友,可能因為佢哋嘅藍眼睛同鬈髮好得意。好似呢個妹妹,我喺車上面同佢眼望眼好耐,趁佢媽咪唔留意即刻影咗佢。」
親情常在心
「馬騮同人喺舉手投足好多時都會好似,我喺野生動物園見到呢對馬騮,睇見大嗰隻為細嗰隻捉蚤時,唔單止覺得好得意,仲覺得好warm。」
哀求的眼神
「我去孟加拉探訪,當地好多小朋友喺街上行乞,呢個小弟弟冒雨抱住個BB喺街度乞食,佢拍我哋嘅車窗時見到佢呢個可憐嘅眼神,好心痛。」
團結救四川
「四川汶川發生地震之後,我去當地探訪時見到一條好長嘅車龍,所有貨車都載住救援物資,相片中只係一小部份嘅車隊,實際係好長,好震撼。」
鬼影幻變杯
「去美國嘅M&M舖頭,其中兩幅牆掛滿巨型杯,有好多顏色好壯觀,我嗱嗱聲攞部Ricoh影低,再加埋專登郁一郁,造出家呢個效果。」
倒數時光機
「唔好以為我係影個鐘嘅倒影,個鐘都係咁樣,呢個鐘好多artist都見過,係喺一間studio裏面,我見到個鐘就聯想到諷刺呢兩個字。」
每當變幻時
鄧麗欣喜歡隨時隨地拍照,對象除了是身邊的人和物外,Stephy最喜歡捕捉的,就是天和雲的幻變形態,隨着天氣時間和她的心情轉變,天空總是那麼吸引。
日落奇景
「我好鍾意影雲,呢張喺大西洋城嘅酒店影出去,我等日落影咗幾張先捕捉到呢刻,啲雲好似喺太陽上面散開咁,好似一朵花又似一把扇。」
凋零花語
「好多人只會睇到美麗光明嘅嘢,其實會唔會有時都會諗吓另一面。我喺屋企見到朵玫瑰花謝咗,咁啱又背光,睇落去朵花好似講緊一個古仔畀我聽。」
石頭雲海
「另外一個影雲嘅好機會就係坐飛機,因為喺機上你先有機會喺啲雲上面望清楚,呢個雲海係我朝早時影,覺得佢排列好整齊,好似一嚿嚿石頭咁。」