南非世界盃分組賽完結，16強展開令世盃熱浪再掀高潮；身在英國角逐溫布頓網球公開賽的各國球手，或因心繫國家足球隊的出線形勢而累事，早前已有多位種籽球手爆冷出局。2號種籽西班牙的拿度周四亦危危乎，以盤數3:2反勝寂寂無聞的荷蘭球手哈斯，晉級第3圈。
今屆世界盃奪標大熱西班牙，在首輪分組賽爆冷0:1不敵瑞士，除了令到一眾「狂牛」球迷嚇餐飽外，亦影響到一眾心繫西班牙出線形勢的球手之比賽心情。結果在溫網首圈賽事中，「西班牙兵團」差不多已經全數出局，最驚嚇為8號種籽華達斯高爆冷以盤數1:3負世界排名83位意大利球手科里尼；另外，費里路、艾馬哥及羅比度亦已悉數出局（見附表）。
場內不會顯示世盃賽果
即使國家隊贏波亦未必有好處，興奮的心情亦可能影響比賽情緒，瑞士的華域加同樣首圈出局便是最佳例子。溫網已重申將不會在場內螢光幕，或以其他方式顯示世盃賽果；故當瑞士於周一與智利進行分組賽時，亦令同日出戰男單首圈的費達拿分心，他最終驚險地反勝科拿晉級。
「最新鮮」的例子是同樣是「足球狂熱分子」的08年溫網冠軍拿度，或許因西班牙出線形勢未明朗（未計周五晚賽果），他周四在次圈表現顯得患得患失，往往受制於世界排名151位的23歲哈斯的發球，更曾陷於落後盤數1:2的出局邊緣。
拿度及時回勇反勝3:2
幸好拿度及時回勇，盡顯「狂牛」本色，連追兩盤6:0、6:3反勝，晉級第3圈後，拿度將對33號種籽德國的柏舒拿。生涯7奪大滿貫冠軍的拿度賽後猶有餘悸。他說：「好在我的心理素質較佳，由於曾陷入出局邊緣，所以對於能夠勝出我感到非常高興。這亦是一個很好的考驗，最好消息是我現在已打入第3圈呢！」
拿度亦有提及他與英女皇緣慳一面，而費達拿、迪祖高域、梅禮、盧迪克均有覲見英女皇。拿度說：「賽會方面知道我的行程，我習慣賽前會有訓練，根本分身不暇，對於無法英女皇會面，我真的很失望。」
綜合英國外電
《花絮》
軒寧最愛阿根廷
復出後首戰溫網嘅軒寧日前出席贊助商活動時話，佢十分留意世盃比賽狀況，雖然佢嘅祖國比利時無緣踢決賽周，之不過基本上佢都會睇晒世盃每一場賽事，佢咁好精力，真係驚人！軒寧就話咁多隊最愛兼力撐阿根廷，之但係就唔肯講最鍾意邊個球星喎！
細威見完英女皇發火
世界「1姐」兼衞冕女單嘅美國莎蓮娜，周四就同埋一班星級球員，齊齊覲見英女皇，佢話自己緊張到講唔到嘢，只係識得講「很高興見到你呀！」而握手嗰陣仲feel到自己係咁手震！但係後來講到溫網嘅安排，「細威」就即刻「變臉」，發晒火咁話安排唔公平，點解身為「1姐」嘅佢都唔可以場場喺中央場比賽喎。
伊斯拿長命賽後謝晒
美國伊斯拿喺周四擊敗法國嘅馬亨，完成咗經歷3日、長達11粒鐘嘅「長命賽」後，他周五出戰次圈時明顯無晒力，僅戰74分鐘後便以直落3盤輸畀荷蘭嘅迪比克。伊斯拿（左）雖然出咗局，但佢同馬亨（右）創下網壇史上最長戰役。兩人及裁判費利民於周四賽後亦獲頒水晶碗、溫網領帶、銀色鈕扣做紀念品，佢呢次溫網之旅都算係「收穫豐富」吧！
