金勞詹噚日喺立法會發言時，無啦啦話職工盟李卓人祖先好有錢，但因為冇留家產畀佢，嬲嬲哋咪去搞工運囉。當時阿人唔喺位，唔可以即時反駁無理指控，反而公民黨吳靄儀好嬲，不滿金勞詹質疑同僚動機，認為佢嘅發言違反議事規則。
撩起吳大狀把火
主席曾鈺成未裁決，金勞詹已經發難，話唔使阿主席同吳靄儀教佢點做議員，仲話法律界議員就係咁嘅態度喇。金勞詹冇品仲要咁寸嘴，呢次真係撩起吳大狀把火，要求主席裁決。金勞詹唔肯收番言論，曾鈺成暫停會議，捉咗金勞詹同做架樑嘅謝偉俊入房，十幾分鐘後，金勞詹先話係無心冒犯。
主角李卓人話自己係潮州人，阿爺同金勞詹相識，但佢兩歲已經嚟咗香港，唔通潛伏喺度咁耐？金勞詹事後向阿人解釋話講笑啫，但阿人覺得，喺咁嚴肅嘅時候講咁無聊嘅笑話，好低水平囉。