早前因為商台俾民建聯買起深宵時段搞《十八仝人愛落區》、而含淚狠批公司引入魔鬼更愧對林彬嘅商台名嘴潘小濤，噚日透過大氣電波，向民主黨八個立法會議員發表一封公開信，要求佢哋先辭職再補選，先同選民算清筆賬，今後就可以安心上妥協之路。
係勇氣同承擔嘅表現
小濤噚日朝早喺《在晴朗的一天出發》節目嘅聲音專欄〈萬佛朝中〉度，讀出呢封信，並喺facebook開設「請八位民主黨議員辭職」群組，至噚晚9點已有210人加入，夜晚再喺佢自己嘅節目《串》度解釋原委。
小濤同八方講，今次係佢首次喺facebook開群組，因為家市民只有網絡同選票，作為香港民主長期支持者兼民主黨選民，佢想喺公開信度同民主黨議員講清楚。佢話，民主黨副主席劉慧卿承認佢同民主黨爭取民主嘅方式「變咗」，放棄爭取2012年雙普選，接受一個未有終極普選保證嘅方案，卿姐話向市民道歉並接受市民譴責，係勇氣同承擔嘅表現。
但咁樣唔夠，因為民主黨上屆選舉時嘅核心政綱，係爭取2012雙普選。今次民主黨主動放棄爭取2012雙普選，事先完全冇諮詢選民，係「失信、失義於我們這些小市民」。競選政綱係同選民嘅契約，係嚴肅嘅政治承諾。小濤舉例，日本前首相鳩山由紀夫競選時承諾日本民主黨執政，就會遷走冲繩嘅美軍基地，最後兌現唔到，就要黯然下台。
香港嘅民主黨亦應辭職，不僅向選民交代，亦係「完成自我救贖必不可少的手續」，因為同選民嘅選舉契約已經失效，啟動補選程序，等選民喺佢哋新政綱下重新授權，咁民主黨嘅議員往後亦可輕裝上陣，同原來嘅選民、原來嘅政綱，貨銀兩訖，互不相干。
可由何俊仁代表辭職
小濤話，反正民主黨議員重新上車機會好大，因為除咗有支持溫和路線嘅中間選民外，建制派左派都唔會狙擊佢哋。如果驚俾人話浪費公帑，咁可以由何俊仁做代表辭職再參加補選，咁以後就算民主黨點轉型、點樣唔放棄爭取真普選，都同佢無關。
小濤咁講都好有道理，但唔知仁哥點睇呢又？
mailto:[email protected]