新一輯檸檬茶廣告，留下了沒結局的白。時針回撥十多年，當年暗戀男同學的張栢芝，今日由何思諺（Leanne）接棒；被戲稱為「陽光妹」。只是，外表陽光，內心可能很陰沉，Leanne就曾因別人一句說話險些自毀生命。 撰文：藍文浩
身為90後的Leanne，2008年入行，去年為自己訂下3個目標，第一：拍一個廣為人知的廣告；第二：去歐洲旅行；第三：影寫真集。3個不算大也一點不小的目標，半年之內就完成了，豈料卻不懂紓緩壓力，差點了結自己的生命。
今年初新一輯陽光檸檬茶廣告播出，不少人對Leanne的氣質驚為天人，她所定的首個目標完成。之後所屬公司決定到巴黎拍攝寫真，更破天荒不推出印刷版，只供向隅者網上下載，此時，出奇蛋的3個目標都達成了。但此刻卻是Leanne壓力爆錶之日，觸發點只是因為一句說話。
情緒低落想死
Leanne說：「我平時係一個正能量爆燈嘅人，但係3月有一日去影相，個攝影哥哥用好唔友善嘅語氣問我：『做乜你要做Model啫？』我即時喊咗出嚟，仲好down同好唔開心，返到屋企好靜又好空虛，好想離開呢個世界。之後我同ALin講，佢不斷開解我，好彩我上網又見到人哋寫嘅諺語，大概係話既然有膽去死，點解冇膽去面對呢？呢啲句子真係可以令人振作，甚至係一個鼓勵。」
男友要似叮噹
陰天過後就會有陽光，Leanne達成自己3個願望之餘，出國旅行散心之後情緒平復了，年輕人不怕天高地厚的傲氣也回來了。她說：「同栢芝相比，我希望可以更好，我又有機會拍戲，又去巴黎影寫真，本書仲會有我自己寫嘅文字，算係自己嘅心路歷程。我真係冇諗過可以去巴黎影寫真，仲有一段好夢幻嘅艷遇，喺巴黎鐵塔下面，有個男仔踩住單車埋嚟搭訕，不過我最後影咗張相就放走咗佢，我希望有一段童話式嘅愛情，男主角唔需要靚仔，最好好似叮噹咁，我有乜嘢問題都可以幫我解決到。」
何思諺（Leanne）
歲數：19
三圍：32-24-34
身高：168cm
入行經過：經理人公司於網誌留言，邀請拍攝廣告後入行。
攝影：仇志德
化妝、髮型：WongWing
服裝：Gimlet@JFT、LipService@JFT
場地：Munch
陽光出新星
陽光檸檬茶深受年輕人歡迎，全賴一班靚仔靚女效應，當中最經典要數鄭伊健及張栢芝的純情學生look。
鄭伊健（1987）
與女主角在汽水車邂逅，上演一幕「雨中送陽光」，穿校服的伊健咧嘴一笑竟出奇地自然呢。
樊亦敏（1989）
回到80年代的美好，秀麗的樊亦敏、黑膠碟、電話亭、還有蘇永康的廣告歌—如陽光~~~
方力申（1997）
在廣告中只出現一個鏡頭，搖頭聳肩，若不用slowmotion再加放大鏡，相信冇可能認出他。
黃宗澤、張栢芝（1999）
穿校服、紮孖辮的栢芝一副很儍很天真的模樣，迷死少男，風頭完全掩蓋赤膊上陣的黃宗澤。
資料來源：《蘋果》資料室
