民主黨內訌，上有議員脫黨，下有義工反黨。噚日立法會門外嘅反政改集會，一位自稱死撐民主黨20幾年嘅義工玲姐，以「北區自由戰士」嘅姿態，擺下易拉架，要求泛民議員為普選戰鬥到底。八方走近一睇，發現易拉架前面就係玲姐嘅民主宣言，背後就係民主黨北區區議員黃良喜嘅宣傳海報。
報稱做生意嘅玲姐都算抵死囉，居然借用民主黨區議員嘅宣傳品，來反對民主黨嘅優化區議會功能組別議席方案。玲姐同八方講，劉慧卿同何俊仁競選嘅時候，佢唔食飯都幫手派傳單，諗住佢哋為香港人做嘢，點知經此一役，白鴿黨轉軚，玲姐話忍無可忍，決定企出嚟鬧爆民主黨。