牛熊分界線究竟對散戶實戰炒股有無意義？又有人力陳250日線唔係所謂「牛熊分界線」。恕星俠才疏學淺，真係唔識！港股腳軟，恒指失守250日線，聽落好似幾驚，但成交得477億元，沽壓唔重。
有人話，低息環境拖長，資產泡沫好易吹大。以目前呢款市況來睇，連炒股搵食都難，莫講話資產泡沫！
內地樓市遭措施打殘，家陣人民幣升值憧憬醞釀，又可否帶動內地樓市回暖？下半年係內房商推新盤高峯期，市場預料唔少發展商減價促銷，不過，恒盛地產（845）強調唔會減價，因集團主力發展中高檔樓盤，客路唔同，毋須割價求售。
集團今年首5個月銷售額約19.5億元，與全年150億元目標仍有一段距離。
恒盛股價自4月初3.44元高位出現調整，最低見過2.17元，累跌37%，6月份開始反彈，周初曾升至2.57元，惜未能突破50日線阻力，昨回跌2%，報收2.44元。此股只宜候低收集，戒高追。
方星俠