成日聽人話，經濟已步入復蘇，但港府前排公佈失業率升咗，同樣升嘅仲有通脹。有份工嘅就要努力工作，保住飯碗喇，唔係點面對通脹壓力！
有朋友同敏妮講：「大不了全職炒股。」雖然港股九連升，但始終唔係大牛市，唔係瞌埋眼炒股都會贏嘅時候噃！「敏妮，你唔係話過，炒期權，乜嘢市況都可以贏錢咩！」理論上係，但要熟悉呢種投資工具，同好投入去做，對於新丁嚟講，咁快就諗住靠投資期權過活，會唔會樂觀咗啲呢？
熟客定存息可比牌價高
不過，對於穩陣派投資者嚟講，家陣係好日子，因為銀行差唔多隔日就有新優惠推出，而且「高息戰」由定存蔓延到去活期存款。好似去大眾銀行新開活期存款戶口，10萬蚊樓下有0.2厘息，10萬銀以上就有0.15厘息，但以日息計算，當日最低結餘3000蚊或以上，嗰日先至計息，比起唔少銀行嘅1個月定存仲高息。
其實唔使等銀行嘅推廣先至有優惠，熟客嘅定存息率通常都有得傾，可以比牌價高，而且間間分行唔同。熟客唔一定要好似敏妮媽咪咁，得閒冇事都落銀行，同相熟經理或者teller打牙骱先叫熟客。開戶一段時期，或者幫襯咗其他銀行服務，做定存時，開口同銀行問吓有冇優惠啲嘅息率，識做生意嘅銀行，通常都有啲驚喜。之前有銀行推1個月銀行定存有1厘息，但限期只有1個月，而且只限30萬蚊，其實老早已經有銀行向熟客提供3個月定存1厘息優惠。
講開銀行推優惠，其實唔係香港銀行先至識做，好似喺深圳嘅建行就推出91日人仔定存優惠，利率高達3.7厘，據講吸引唔少經常往返中港兩地嘅港人去開戶。
溫敏妮
http://wanmanli.com/blogs/