曾奪07年叱咤樂壇新人王獎項的李卓庭，向來打扮中性，她去年被傳暗交何韻詩，但近日卻跟HotCha成員Winkie黐到實如孖公仔。前晚兩人在尖沙嘴一茶餐廳撐枱腳再蒲吧睇世盃，李卓庭遞碗筷遞紙巾兼埋單，風度猶勝鬚眉。
現年27歲的李卓庭年前曾一度跑出，勇奪商台叱咤頒獎禮的新人王寶座，奈何因她轉唱片公司，氣勢無以為繼，雖然事業受挫，但其感情生活就多姿多采，去年她與何韻詩傳緋聞，不過疑似斷背一閃即逝，反而最近她與女子組合HotCha的22歲成員黎美言（Winkie）玩埋，經常孖咇四圍去。
遞紙巾兼埋單
前晚李卓庭和Winkie現身尖沙嘴一茶餐廳，前者打扮隨意，後者更素顏以街坊look出現，兩人坐於茶餐廳的戶外位置，各自點了一碗麪及凍飲。現場見她們全程雞啄唔斷，李卓庭體貼地為Winkie攞筷子，又遞紙巾給Winkie抹嘴，離開時李卓庭更負責埋單。
接着二人再往酒吧消遣，現場人頭湧湧，爭睇英格蘭對斯洛文尼亞的賽事，李卓庭與Winkie還一邊啜飲品一邊咬耳仔，至球賽播映完畢，李卓庭又埋單，然後二人漫步老尖，Winkie還送李卓庭到巴士站，待她登車後才離開。
讚Winkie熱情
對於再惹斷背疑雲，李卓庭昨回應時說：「出去食飯好正常，遞紙巾遞筷子呢啲動作，我不嬲都有，佢鬼妹仔性格open啲，幾熱情，我哋同年入行，好投契，大家又鍾意英格蘭，佢鍾意朗尼，我就鍾意謝拉特。」李卓庭更強調自己性向正常：「我真係鍾意男仔，不過我性格男仔頭，形象又中性啫。」
採訪、攝影：李志明、羅德光
