北京接納一人兩票區議會方案，民主黨起錨同建制派一齊向前走，白鴿黨呢幾日變成箭豬，俾人插到失魂，尤其係自己友鬧得仲狠，其他泛民議員以強烈炮火批評民主黨，創黨成員鄭家富更加忍着淚說分手，一時間白鴿黨好似眾叛親離，泛民好似七國咁亂，幸好，天佑英格蘭，天佑泛民主派。
齊齊捧英格蘭
香港人有殖民地情結，睇波都鍾意追捧英國波，四年一度世界盃港人集體回憶英治時代美好時光，幾乎人人都捧英格蘭。英國國家隊勝負牽動前殖民地子民情緒，前晚英格蘭驚險出線，好多香港球迷鬆一口氣。白鴿黨高達係英格蘭擁躉，噚日坦言對英格蘭贏波感到好興奮。高達指英格蘭雖然贏得驚險，不過表現好過之前兩場，佢話為慶祝，下次開會時會着英格蘭波衫出場，唔好嘥咗呢件花幾百蚊買嘅波衫。
前晚散會後，白鴿黨主席何俊仁由幾個兄弟陪伴離開，卻見唔到李華明。佢噚日同八方講，由於實在太緊張英格蘭對斯洛文尼亞，所以散會後第一時間離開立法會趕返屋企，好彩走得快，睇到大半場，慶幸英格蘭出線，今屆世界盃仍然有興趣睇，否則就冇癮嘞。
宣佈退出民主黨嘅鄭家富，同其他前黨友一樣都係捧英格蘭，阿富稱會後回家睇波，見到英格蘭贏一球，即時放下心頭大石，心情舒暢番，「好彩英格蘭贏波，都冇咁唔開心」。社民連主席陶君行向來捧英國波，因此雖然已經退出民主黨多時，同民主黨政見水火不容，但講到睇波依然有偈傾，話晒大家捧埋同一隊波，一team人可以被北京分化，但要離間佢哋唔捧英格蘭睇怕冇咁易。
長毛以波論政
我行我素嘅長毛，睇波口味同其他人有啲分別，對於眾人熱捧嘅英格蘭，長毛批評得毫不留情，同指斥民主黨背叛選民不遑多讓，長毛指英格蘭戰績飄忽，戰略保守、球技平庸，只是二班頭、一班尾球隊，奪冠無望，八強止步，以波論政，佢比好多人都睇得透。
mailto:[email protected]