將於9月移居台灣兩個月嘅何韻詩，噚日到新城接受訪問，阿詩透露到時喺台灣做嘢會好忙，通告排得密麻麻，兩個月內只有一個星期喺香港。由於會留成兩個月，所以阿詩會租屋住，問到怕唔怕畀狗仔隊偷拍？阿詩一言驚醒話：「冇諗到呢點，睇樓時只留意景觀，心諗去到咁遠未必會有人偷拍，如果真係拍到就寫個服字。」佢又話留喺香港時會同《女王辦公室》嘅拍檔汪明荃食飯喎。