塵世間無聊官司何其多！好似近排風高浪急嘅騰訊（700）同埋搜狗，前排因為拼音輸入法軟件問題，分別向兩個中級法院告對方「不正當競爭」，各自要求對方賠2000萬人民幣（下同）俾自己。咁雙方嘅「寃情」何在？搜狗話，騰訊響推廣QQ拼音輸入法嗰陣，惡意誘導用戶刪除搜狗拼音輸入法；而騰訊就反咬對方，話人哋個搜狗拼音輸入法響後面做手腳，干擾QQ拼音輸入法嘅正常運作，仲誘騙用戶刪除已經安裝嘅QQ拼音輸入法。
你估兩個法院嘅官又點判？市一中院判搜狗賠24萬銀俾騰訊，點知市二中院就判騰訊賠23.1萬俾搜狗……好明顯，呢啲咁technical嘅嘢，清官都係唔識審o架嘞，呢鋪狗狗企鵝互咬，惟有判一比一打和囉！