既可以聽歌，又可以睇片嘅PMP近幾年大行其道，小妹都有一部，搭地鐵返工嗰陣播場戲消磨吓時間都唔錯，但係畫質同音效，比較屋企嗰套家庭影院差好遠，特別係一啲飛車槍戰嘅場面，做唔到環迴立體聲嘅效果。
屏幕支援720p高清
Philips巿場經理譚頌樑（Marcus）同小妹解釋，因為PMP係戴耳機聽，先天缺憾導致啲聲只有立體嘅效果，空間感比較薄弱，就算用到點靚嘅耳筒都冇用。Philips啱啱推出嘅GoGearMusePMP，加入咗Surroundformovies嘅技術，將影片嘅音源重新定位，加強咗主體聲音同背景聲音嘅層次感，營造成環迴立體聲嘅效果。另一個FullSound技術可以加強低音嘅音效同高音嘅層次感，「部機仲內置咗播放軟件Songbird，可以將CD翻錄到無損音頻檔案，用家可以享受最原汁原味嘅歌。」
講咁多專業名詞都冇用，用耳仔聽最實際。小妹試睇一段行雷閃電嘅影片，發覺音場係闊咗好多，雷聲好沉實，發揮咗環迴立體聲嘅效果。
睇戲時聲幾靚都要有畫面配合，Marcus話，新機備有LED背光技術嘅3.2吋輕觸式屏幕，可以支援720p高清影片。小妹都覺得畫質唔錯，但嫌個芒細咗啲；售價1,199元起，都唔算平，可以接受啦。
電郵：mailto:[email protected]