呢個世界跟紅頂白，做生意嘅人都係一樣，賣波衫嘅唔理你件衫設計得有幾靚，輸波出局收場就注定被賤價拋售，一於清貨為先。
法國小組包尾出局，成績唔好已經令到件波衫貶值唔少，最衰就係連串羞家事不停咁爆出嚟，就連法國國民都唔撐，聲譽盡毀。所以就算法國嘅主場波衫設計得幾有型，國旗顏色嘅紅白藍齊晒，最後都因為國家隊唔爭氣而變得唔受歡迎。我就已經見到有舖頭將法國件主場波衫以唔使300蚊清貨，對於一早買定嚟捧「公雞」場嘅球迷，真係「雙失」，好似死硬法國躉、戰友牽牛咁，買咗件印埋哥古夫嘅法國戰衣，只好苦笑，惟有勸佢第日有機會到法蘭西時，唔好着呢件波衫去。
今晚「一剔」大戰，巴西和都首名出線，唔會去盡，吼D。文：戰鬥員A
今日貼士
星期五6葡萄牙和
信心指數：★★★★
註：5★最高