如果嫌今屆世界盃太悶，可以上網睇Lego版世界盃。19歲嘅德國學生摩歷茲，用積木人將精采片段重新拍攝，仲擺埋上網公諸同好（http://www.legofussball.eu），吸引每日34萬人點擊，難怪當地報紙爭住同佢簽約，連英國《衞報》都搵佢整晒所有英格蘭賽事。
早在3年前已幫當地一個球會製片嘅摩歷茲，覺得今屆賽事唔夠精采，於是諗計用Lego重新包裝。佢話每一個入球要用2至3個鐘去整，試過整到凌晨3點幾；好彩觀眾反應好，而家喺《衞報》網站上播放嘅英格蘭對美國賽事，已經有130萬人次瀏覽，獲得各地觀眾一致好評。
好評如潮網上熱爆
今次Lego世界盃同我哋《蘋果動新聞》做嘅動畫、或者免費台嘅3D片唔同，摩歷茲用嘅係定格拍攝，即係先用手為積木人做每個動作，然後逐格影相，一個入球大約要影80張相；加埋電腦特技個波就識飛，為咗更加過癮，仲會用原本嘅電視旁述。
惡搞朗尼M字額
最令人嘆為觀止係細緻度，球員特徵如朗尼嘅M字額，而球員列隊、入波反應、觀眾吹「魔鬼喇叭」嘅現場氣氛都一絲不苟。摩歷茲有過百個積木人俾佢揀，當中有啲已經成30年歷史；法國列貝利件藍色球衣係嚟自海盜系列，德國教練路維就係哈利波特其中一角，但佢話髮型唔夠，羅拔格連牛油手出洋相嘅鏡頭，就整咗頂帽佢帶，好彩英國人唔太介意。
FanZone
已經退役的前日本國腳中田英壽（圖左），亦藉南非世盃熱潮，到當地同小朋友踢波，其一身潮人打扮，仍不失型男本色。GettyImages
當年今日：25/06/86
阿根廷贈比利時雙蛋入決賽，球王馬勒當拿雖然全場被比利時守將夾擊、踢死腳，仍包辦阿根廷兩個入球。
有數講：18
意大利隊長簡拿華路合共在世盃決賽周上陣達18次，為今屆南非世盃全部球員之中，在決賽周上陣次數最多的現役球員。