新任英國首相卡梅倫上任後大肆整頓經濟，連英女皇都要凍薪。慳得一蚊得一蚊，女皇打算縮減皇室成員至4人，只包括自己、皇儲查理斯、威廉同哈里王子，其他王子公主被列作二線皇室成員，要下崗自行找財路，只為唔想睇見因經濟問題放棄皇室傳統。
同是傳統，卡梅倫對銀行取態剛好相反，無懼大行威脅撤出，決意向銀行徵稅。本來銀行有難時要納稅人打救，就好應該盡責任，夾錢以備不時之需。問題係堅拒向納稅人伸手嘅滙豐控股（005）同渣打集團（2888）均受牽連，認真無辜。
事件證明，滙控當初將行政總裁辦公室搬回香港決定冇錯。唔知上個月仲表明無意搬遷嘅渣打，會否改變主意，抑或情願付高價力保英國護照。
卡梅倫不惜一切保住英國3條煙（AAA）信貸評級，英鎊即時重振雄風。記得金融海嘯後第一個較有效嘅救市行動，亦係由前首相白高敦提出迅速注資銀行。比起現時歐盟各自為政、美國亂印銀紙，英國處理危機嘅政治智慧確係高幾班。
各自為政自相矛盾
不過，特區政府彷彿將英國人留下來嘅辦事能力忘記得一乾二淨，施政處處「打亂章」。針對樓市炒風，原意係增加土地供應，主動拍賣何文田豪宅地，結果赤裸裸讓公眾同發展商一窺政府心目中嘅地價底牌，發現原來麪粉仲係要貴過麪包，根本就係講一套做一套。
財爺沾沾自喜嘅9招12式，明明話小型新盤首推起碼要出售30%，大型項目就最少要推售一半。轉頭運輸及房屋局就澄清，話一半係指推出單位嘅一半，至少要30或50伙，即係發展商可以自定首批單位伙數，新規定形同虛設，政府威信盡失。早知粗暴介入發展商賣樓行唔通，政府早應喺設計政策時諮詢業界意見，而唔係黑箱作業。
政府部門各自為政，自相矛盾，明知不可為而為之，且看天匯事件又查出啲乜，希望不要讓無殼蝸牛再次失望；否則真係要學施老闆話齋要急急上車，因為香港樓價易升難跌。當然，為求自保，都要偷番李超人一句：奉勸置業者要「量力而為」。如果施老闆係賣花讚花香、李超人係利益集團，咁我都應該算係既得利益者，因為住緊自置物業，樓價升對我有好處。
胡孟青