HTC平霸入門　野火推App

iPhone4美國開賣，水貨亦火速殺過嚟，但估唔到有人敢同佢打擂台；今個星期HTC公佈新機Wildfire，走中低價路線，內置特別功能，遇上乜嘢好玩實用App，你可以直上交友網推薦朋友試用，指點朋友去玩App。

記者：許福合
攝影：王文忠

光學感應器

Wildfire感覺相當惹火！顏色除咗黑、白，仲有較少見嘅火紅，同個機名勁貼切；價位亦打年輕人主意，走入門級路線，開價$2,798，Android機嚟講算吸引。外形極似迷你版Desire，3.2"電容式屏幕，簡化嘅操作鍵設計，最搶眼係中間粒光學感應器，操作順暢如滑鼠，有時須要較精細嘅操控，感覺比Touch芒更精準。Wildfire用Android2.1系統，當中自然唔少得AndroidMarket，例如現時相當熱門嘅YIYI，吃喝資料勁齊全，想介紹朋友齊齊用好簡單，佢可直接透過Facebook、Twitter、Flickr及電郵指點朋友，仲可以分享大家心得。

■森美擺晒Pose影相，不過個肚腩突晒出來喇！

■這粒光學感應器靈敏度相當高。

■有好用App？可直選分享至多個社交網站。

FriendStream一眼睇晒

HTC機當然唔少得Sense操作介面，支援多點觸控，並且與各大交友網站更緊密，如果你交遊廣闊，玩齊多個社交網站，FriendStream實啱你，佢可以一次過Show晒多個網站內朋友嘅更新同貼文內容，仲可以即時查番朋友最近短訊、來電及郵件，永無失拖！不過講到最正都係來電時，可以將Facebook相片，當作來電大頭照，連生日都會跳出來提醒你！（唔通怕你忘記送禮物？）相機又怎少得呢，500萬像素配LED閃光燈，有微笑即拍及GPS紀錄功能，影相方便又不怕忘記拍攝地點。