近年醫生為爭取權益，唔單止告上法庭，好多時都要用啲進取嘅方法至頂得住醫管局，代表公院醫生嘅公共醫療醫生協會（PDA）今日選新主席，由副主席蘇潔瑩同廣華急症室科服務主管董偉杰對壘，佢哋仲係「余曾辯」同日搞咗個forum辯論。
兩候選人辯論
以往PDA選主席，好多時都係一個人出選，冇對手自動當選，八方原本都以為副主席蘇姐冇對手下，自動成為PDA首位女主席，締造歷史開創先河，點知董偉杰突然殺出。董醫生係廣華急症科COS，算係管理層，佢港大83班畢業，中大候任校長沈祖堯係佢同學。
工會上星期四舉行候選人論壇，去嘅人唔多，工會全程拍片放咗上YouTube，可以睇到蘇、董兩人講政綱，就工時同醫科生等議題辯論。至於邊個表現好啲，八方無甚麼意見，可以投票嘅醫生，大可上網睇睇先投票。