哥本哈根估估吓　無腦殘泳帽

「買咩手信好？」
「藍罐曲奇。」攝影師答。
「爛gag！」我怒睥。係，雖然到最後，我哋都喺機場抱走幾盒，味道真係唔錯的藍罐回家，不過丹麥更出名的還有成日喺雜誌出現的搞鬼家品設計，得意想法總博得你會心一笑。隔一排運來香港，售價貴成倍都有之！

記者：陳慧敏
攝影：陳陶鈞

買手信喎，都係細細件好。設計師的員工們都一致推薦的有CasaShop。好熟？當然，雜誌《Casa》，《Wallpaper》都成日出現其介紹。
「好型呀！」攝影師睇中咗個咕同托盤混合體，「以後可以舒舒服服坐喺床食早餐，又不怕跌到一床都係喇！」我一眼就看中了畫了個腦的珍珠色閃光泳帽！「睇你哋仲點話我無腦或者腦入水！」另外夏天必備有恐龍骨冰格，不過我都係鍾意最近新出的人腦冰格！由1985年開業起就專賣丹麥及歐洲的頂級設計師家品同小玩意，相較起NormannCopenhagen，這裏多一點抵死設計。如扮摺紙的燭台、多款BB家居吊椅，「細佬」造型的燭台、掛勾甚至花樽，搞鬼玩意，一間舖都可以玩好耐呢！

■丹麥的店子都好開放，由得我們東摸摸西玩玩，無人實，讓你睇夠玩夠才買。

■終於有方法話畀人知，我有腦嘅啦！

■架鐵皮車仔適合兩歲以下的小朋友。片車老鼠約$470

■咩嚟？咕與托盤混合體，供你放喺大髀在床上食早餐、打機、飲水、瞓覺、玩層層叠……

■解暑冰河恐龍，雪出一嚿嚿恐龍骨，俾你扮食龍唔骨（我知，爛gag）。

■以為是紙紮燭台，原來真係卡紙來的！不過質地特厚且有層膠喺面。

趕時間又想shopping的朋友，NormannCopenhagen是一定要去的，本本旅遊書及設計雜誌都將之置頂，可知其地位超然。05年開業，兩層的NormannCopenhagen位址，本來是個1,700平方米大的劇院或戲院，今日變了設計名店，卻仍保留住大舞台、樓上雅座的設計，兩邊拱形門、天花板的細緻雕花，都是當年的遺物。可謂跨越了上百年的時間，看今日北歐最新設計。去完米蘭家具展、成日上《Wallpaper》，或者剛攞完國際設計獎項的丹麥設計都齊集至此。而向着舞台的，還有張很巨型、手工拼製的灰色布椅子，是OleJensen設計的MemoryChair，因為設計得太舒服，一坐上去，過去的回憶就會重現眼前，跟這古老劇院正好配合，成為店裏的招牌。我爬上座椅（對亞洲人而言係幾高o架）實在太舒服，腦裏一片空白差啲瞓着；分甘同味，攝影師都坐吓吖？「唔喇，我驚我回想完一生所行，會好似啲卡通片配角咁，會死……」

■成個「戲院」分成不同角落，佈置成不同感覺。

■MemoryChair，全手工製作，坐上去超舒服！

■哥本哈根是單車之城你知道，前面有個豪華廂座，裏面坐住貓仔狗仔細路仔的更多，這一台裏面還有真皮座椅及安全帶，適合兩個2歲以下的小朋友搭乘。

■剛在米蘭家具展裏得獎的椅子。手打羊毛，同「一幅過」的設計，丹麥式簡約，且坐得舒服。不過要十月才開始發售。

如果你在哥本哈根主要的遊客購物大街Tivoli及Stroget徘徊不去的話，你一定有機會經過兩間HayHouse。這在03年時本來只是個本土設計的品牌，08年終於開他的第一間旗艦店，現在開枝散葉。裏面除了賣由丹麥的設計學校設計的小精品外，都有好多來自美國、意大利的小擺設。賣的東西諸如玩具、tee、手錶等潮人玩意都比先前兩間多，家品方面都以電腦袋、動物造型的椅子等較多，目標年齡層又後生一個圈。

■丹麥木雕品及玩具世界馳名。猩猩的關節彎曲度跟真的一樣，仲企得好穩陣！

■啤出來的椅子，可以叠起來省地方！

溫馨提示：哥本哈根潮人區、設計師店分散各處，不租單車彷彿沒了對腳；行路shopping的話，你一定會（累到）無咗對腳。（感謝攝影師先生千叮萬囑要留給讀者們的說話）　