股神炒股大賺，開賭一樣大賺，梗係啦，全球咁多賭仔，最緊要搵啲當黑嘅，咁做莊都唔使慌啦！近期超級黑仔嘅「歐豬五國」（PIIGS，即葡萄牙、愛爾蘭、意大利、希臘以及西班牙），就俾美國賭業巨擘金沙集團睇中，當正「黑豬」係「金豬」。
當年金沙大老細艾德森早着先機喺澳門開賭，結果賺到盤滿缽滿，仲要一年內回本，成為一時佳話。先前成功響獅城擴展版圖，華華參觀過，靚過澳門嗰間好多o架！
估唔到佢最近想向希臘、意大利同西班牙埋手，之不過班歐洲佬要勒緊褲頭，係咪仲有閒錢賭兩手o架？
華華俾一位沾手過賭業嘅朋友一言驚醒，老友話，艾德森喺澳門開賭之後，耳濡目染下可能信咗中國人嗰套「生意淡薄，不如賭博」嘅傳統智慧，於是決定揀喺山窮水盡嘅地方開賭。
咁又係，歐豬今年黑仔到貼地，歐豬越黑，金沙越有機，話唔定今鋪開埋圍骰──通殺㖭！唔知幾年之後，會唔會有人幫佢拍番套《森哥傳奇》，同我哋嘅賭王睇齊呢？