【本報訊】爭取民主的不同策略，導致泛民主派互相攻訐。提出區議會改良方案的民主黨，昨天在政改辯論不斷被社民連成員辱罵「出賣民主」；連支持改良方案的支聯會主席司徒華，也被長毛梁國雄私下出言侮辱「癌病上腦」。無論是否支持方案，泛民主派議員同一口徑反對社民連「自己人打自己人」，職工盟李卓人更要求長毛向華叔道歉，並哽咽力撐作戰20年的民主黨不會出賣民主。
記者：許偉賢 夏志禮
歷來立法會的政制辯論，政府與建制派必然成為矛頭所指，但昨天的2012年政改辯論，民主黨卻成為箭靶，不斷被三位社民連議員攻擊「出賣港人」及「枱底交易」，更被指摘為分裂民主派的罪魁禍首，反而建制派避過捱轟。梁國雄不但誣衊民主黨向中央賤價而沽，更承認日前曾在群情洶湧下指出「如果司徒華個腦同以前一樣咁function，咁就唔會同以前批判過嘅嘢握手」。
曾說華叔「癌病上腦」
泛民主派對盟友互相攻擊感到痛心。身兼支聯會副主席的職工盟李卓人眼泛淚光，點名指長毛「欠華叔一個道歉」：「華叔為香港民主、為中國民主負責任，點可能到佢家患上癌症時，話佢癌症上腦？點解自己人要鬧自己人到咁地步？」
李卓人更為民主黨「平反」：「就算今日我唔係太認同民主黨意見，但絕對唔會話民主黨唔係自己人；我對佢哋絕對有信心，絕對唔會話佢哋係出賣民主；民主黨嘅朋友砌咗20幾年，邊到有人會想衰收尾？」他呼籲泛民別再互相攻擊，免成一盤散沙。民主黨張文光也批評長毛不應侮辱終身為民主奮鬥的老人家，反問該黨以一步一腳印方式爭取民主「何錯之有」。
公民黨湯家驊也語帶哽咽稱，有人以極端及惡毒言語批評曾經付出極多的民主前輩，「無論你點睇都唔應該以佢嘅病態作為批評佢嘅基礎」，不點名力斥：「你指摘佢（華叔）係背棄民主，出賣港人，係對佢最終極嘅侮辱。」公民黨也在報章刊登廣告，呼籲泛民同道毋須互相撻伐。
梁國雄離開議事廳時，承認私下曾向朋友說司徒華是「癌病上腦」，但強調不會道歉，指華叔與民主黨亦曾對社民連成員作出人身攻擊，「我唔會再當司徒華係朋友」，但表明不想華叔因患病離開人世，他說：「如果我想佢死，又點會推薦個好醫生畀佢？」華叔接受查詢時稱：「我唔會嬲佢（長毛），因為呢次只係顯示出佢嘅人格。」又指言論「唔會侮辱到我，而係侮辱咗佢自己」。他強調民主黨會員大會有近八成黨員支持方案，亦有不少港人支持方案，他說：「唔通你又話佢哋係癌上腦？話佢哋係黐線？」
何俊仁：日久見人心
面對社民連的連番狙擊，民主黨企硬支持政改方案。主席何俊仁重申「民主黨絕對沒有亦絕對不會放棄爭取終極普選嘅理想」，強調「路遙知馬力，日久見人心」。他坦認與盟友出現政治判斷上的分歧，但非基本原則上的不同，「話我哋係放棄理想，出賣民主，我係難以接受」。
近日有市民指摘民主黨08年參選時以2012年雙普選為政綱，黨副主席劉慧卿發言時首度承認改變立場，「我係會向選民道歉，我係轉軚，尤其當我支持政府呢個方案」。她預料妥協後會受指摘，「我會接受市民譴責」，但表明絕無私心，並指市民若不認同民主黨做法，可透過選票作出裁決。議案今天繼續辯論。
