前世欠咗Apple，買完iPhone3GS，又話出iPad同iPhone4，唔買又怕追唔上潮流，家連書都俾佢撈埋。嚟緊7月21至27日嘅書展，出版社首推大量電子書參展，當中以iPad同iPhone版最矚目。
漫畫書增貼紙相功能
電子書開發商Innopage創辦人Keith話，今次書展為唔同出版商一次過出20幾本iPad、iPhone兼容版電子書，新書包括連載漫畫《飯氣劇場》，仲加咗「貼紙相」功能，只要選取書內鍾意嘅漫畫，打開iPhone相機，螢幕會出現嗰格漫畫，用家可以同公仔一齊影相；另外又可以刪除漫畫裏面嘅對白，自己發揮創意加落去，放上網同朋友分享吓。
「電子書仲可以令舊書復活。」Keith解釋書局租貴地方細，舊書好快落架，好多人慕名想睇都搵唔到，「好似黃霑《不文集》咁」。佢話電子書唔浪費地方，仲可以增值，好似DJ鄒凱光嘅《愛情補藥黨》電子書咁，新增分享功能，可copy金句如「老伴離去不傷悲，最緊要有部電視機」等，透過iPad上傳到facebook同巴打分享。
Keith話電子書慳咗紙同運費等成本，售價大約只係實體書一半甚至兩成，年輕人又鍾意睇手機多過書，所以早前佢哋首本iPad旅遊書《足足五千年》喺iPhone書下載榜長居冠軍。
新雅文化負責人何小姐話，會喺書展推出大批iPad、iPhone電子書如《排卡講故事》，小朋友睇完古仔，仲可以將古仔重新編排。
電郵：mailto:[email protected]