中大校友評議會後日會員大會突然改地點，由崇基利黃瑤璧樓移師大學港鐵站沙田凱悅酒店旁嘅中大澤祥街教學大樓。評議會大會向來捧場客有限，去年得42人出席，今年隨時幾百人出現。
大家咁踴躍，除咗因為會討論新民主女神像事件同校方「政治中立」原則，仲會選三個新委員。以往改選通常自動當選或出缺，今年卻有年輕改革派徐淑梅、李耀基、黃俊邦，對撼建制派李漢祥、呂令意、蔡明都。
左丁山亂寫候選人
選舉動員拉票攞proxy好正常，「中大護法」左丁山日前喺《蘋果》專欄撰文〈中大校友ProxyWar〉卻惹起好多中大人不滿。候選人徐淑梅話，文中「徐、黃兩位曾做過亞視、港台及社民連」行文混淆，可能誤導讀者同中大校友。佢做過港台、亞視，但絕無任何政治聯繫、政黨背景，也非社民連支持者。
徐淑梅話參選想出一分力監察校政，「香校董（左丁山）標籤年輕人冇意思，不如聽聽我哋講乜先。」佢哋政綱已上網，呼籲校友睇完憑良心投票。師弟妹關心母校，點可以話人「畢業之後還是留戀學生生活，唔想在社會競爭搏鬥，而係想返回熟悉嘅校園搏鬥，在下一代學生面前顯威風」，唔通又可以話啲成日維護校方嘅，係攞住校友個身份，喺中環尖沙嘴做networking搵着數？
至於左丁山話八方係港大畢業生，「驚中大唔夠熱鬧」，八方只係堆填區一個低級小職員，左丁山貴人事忙唔知八方底細好正常，就算佢話八方福建大學畢業，都冇所謂。