電動車曾經是遙不可及的概念，今時今日，竟有機會與三菱i-MiEV來個短敍。這三天與她穿梭街頭巷尾，體驗充電配套，發覺快叉半粒鐘已經可以來回將軍澳元朗，終於知道香港要起錨的，可能就是電動車。
記者：趙慧敏
攝影：梁細權
Model：[email protected]
告別撻車隆隆聲
當上車版記者已有一段時間，從未試過一種用作長測的車，如此受歡迎，差不多每位同事聽到三菱i-MiEV「駕臨」，都露出一副躍躍欲試的模樣，為了讓他們體驗電動車的乘坐感受，一於當上司機，單在將軍澳環保大道已跑上好幾轉，亦可順道收集意見，結果標準答案得兩個字──寧靜。甫進車廂，直至i-MiEV開行，乘客才知已經啟動車輛，全車由電動馬達發動，與引擎聲告別，感覺格外不同。
行車感覺與一般小型私家車沒兩樣，撻車後，錶板會亮在綠色Ready燈號，全車坐滿四人，當中還包括一個超級大肥仔。架車雖然只有64匹馬力，要講推背感，當然無佢份，不過由於扭力十足，加速反應敏銳，唔使一陣，車速已推至90km/h以上，睇番資料，i-MiEV極速可達130km/h，實力絕對不能睇小。其間有人問上一條刁鑽問題，若果不幸發生交通意外，車上的人會否受到電擊，答案當然唔會！i-MiEV設有一套高壓電控制系統，當遇上意外，系統就會第一時間切斷電池與電線的輸出，唔怕電親。
停車場免費任叉
不過講到電動車，最擔心係耗電問題，資料顯示，一個錶大約行160km，係咪真？第一日抱着戰戰兢兢的心情行車，叉滿電後，電錶16格電顯示「充爆」，坐爆人兜咗幾轉環保大道，大約40km電錶已經無咗一半，令人有一步一驚心的感覺，但經過三日兩夜日夕相對，已經大致掌握行駛時耗電量，再衡量充電位置便能安心「上路」。當然揸車時，一定要比揸電油車心水清，否則隨時喺街頭跪低就麻煩，
現時的充電設備，老實講，確係幾滿意，差不多每區都有公眾或私人停車場設充電設備，部份更豁免停車場收費。停車場內電動車設備的指示十分清晰，車主一定唔會俾佢難倒。不過亦有嘢要彈，充電插頭無任何上鎖設備，遇上手多多之人，將插頭拔起，到時只換來一肚氣。由於現時停車場只提供慢叉，要花七小時才叉足i-MiEV，時間確係幾長，快叉當然成為首選，現時全港只有佐敦的百周年紀念變電站提供快叉設備，大約半個鐘就搞掂，速度驚人。不過由於快叉只能充滿八成電量，如果你堅持要叉滿，就要再花個幾鐘進行慢叉，雖然現時不少充電仍屬免費，但就算將來實施收費後，亦不過$0.1/km。不過別忘記以i-MiEV近四十萬元的車價，確實並非一般人可以負擔，有時講環保並非講是否化算，有經濟能力者，何不為環保出一分力。
三菱i-MiEV規格
引擎：電動馬達330V鋰電池
馬力：64ps/3,000-6,000rpm
扭力：18.4kgm/0-2,000rpm
傳動：CVT無段變速，後驅
售價：$395,000
查詢：27211111（寰宇汽車）
