本港今晚凌晨，即美國嘅24號，iPhone4正式開售！記得上個禮拜，60萬人網上訂購出現大塞車，Apple急急叫停，搞到Fans無晒癮；大家最關心係香港幾時返貨，人人以為空運都要26號，但日本機水貨佬話最快今晚有貨，更有機場Sales預測，最狠可能要過萬蚊先成交！
記者：陳國輝、許福合
美版最平傳英版無鎖
以往只得美國獨家率先發售iPhone！今次唔同晒，英、德、法、日四國都同步24號賣iPhone4！先達售貨員早已做定功課，透過唔同國家逐一格價，連埋呢排歐元貶值，法國淨機亦標緊629歐元同739歐元，若以今日滙率計，呢部法國版16GB就要779美元，相比美國嘅599美元，明顯貴咗一大截。
雖然美版最便宜，但機場於上星期竟傳出另一個消息，有傳聞話由O囗代理嘅英國版iPhone4，有可能屬於Unlock版，即任何香港卡都可即插即用！相比其他地方如美國，根據以往經驗，代理網絡商AT&T肯定有SIMLock，至於由Softbank代理嘅日版iPhone4，亦同樣有鎖機往績，機場Sales話，若然確定英版無上鎖，貨到香港必定喪炒！
已破「壁」日版最快到
收到另一則消息，就係真機尚未推出，但Sales們已拍晒心口話iPhone4已可Jailbreak！據三禾電氣負責人Simon解釋，新機採用iOS4，其實Apple早已將呢個新軟件發放畀iPhoneApps班程式設計員，換句話講，即係一早漏晒出街，更有傳外國玩家已經測試JB後嘅iOS4，係百分百完美破解咁話！
Simon仲話，當大家一直以為香港26號先有貨嘅時候，實情更早或已到貨！佢解釋，以時差計，日本早香港一小時，而香港又早過美國十幾小時，當大家同樣於24號發售，最早到港嘅必定係日版iPhone4。當然，一兩日之差對炒家嚟講非常重要，然而一般買家，最關心莫過於售價幾錢，以及有無解SIMLock，好快就有答案。
先達水貨佬估價
出機限制多，如傳聞每人限購兩部，加上多重水腳費，入貨價或超過九千，開價過萬絕對唔奇！
16GB及32GB正價都係599美元同699美元，如果能炒貴三成已經唔錯，預計$8,800至$9,800，好意頭！
想買iPhone嘅人，手上應該有一部，但唔鍾意用嘅人，照計亦唔會考慮iPhone4，$8,000較合理。
雖美國訂購第一日已經爆滿，但係對我哋班水貨商無乜影響，照舊24號有貨，估計$8,000左右。
好多人留意緊平價8GB版iPhone3GS，預計$4,000有找，所以對貴價水貨版iPhone4或有些微影響。
以前得和記一間玩晒，今次連數碼通都有份賣iPhone4，即係話供貨多過以前，斷估炒價唔會太貴！
3GS爽上iOS4 有八成功力！
iOS4終於公開下載，筆者試用一部3GS安裝，網絡就用3仔，升級過程無大問題，不過完成後發現3G網絡不能上網，最後要回復原廠設定，再升番資料落去先KO佢！若你有相同情況可參考一下。
筆者有試玩iPhone4經驗，3GS安裝iOS4後，一般操作爽利程度，有iPhone4八成功力！比較3.3版，速度更有明顯提升，完全唔覺有窒嘅情況，若然唔係為新機、新Look，3GS配iOS4已經好夠用。
iOS4最大賣點，係Multi-Task，雖然千呼萬喚，但暫時不要過份期待，試用發現大部份App都未真正用到，切換程式時只係重新Load過，例如玩緊遊戲，想轉去Safari上網，再回去玩遊戲，就要從新Load過，可能仲要等App升級。
另外，部份App亦出現兼容問題，例如IM+這個即時通訊軟件，在iOS4上極難連線，最後會話你聽連唔到，幸好這類App數量不多。
舊版3GS售價企硬
官方將舊3GS降價兩成，令大眾嘩然！但Sales解釋，雖16GB減至$4,480，32GB/$4,980，但原來預售網一早無得訂，就連街上大型電器連鎖店及先達舖都因缺貨而標舊價！再加埋iOS4升級後咁強，相信機價會企硬！
