世界盃十六強漸次誕生，今屆星俠看好阿根廷奪魁。點解又要提世界盃？港股5月份大調整後，轉入6月即見牛皮，成交亦急降，市場歸因於世界盃開波，如果真係球賽會影響股市，一日世界盃未踢完，係咪代表個市唔使炒？
本來人民幣滙改再啟動，帶動大市成交霎時急增至900億元，唔少散戶一心以為個市又活番，但睇近兩日市況又唔多似。
香港資源（2882）早前全數收購金至尊珠寶的品牌及零售業務後，動作仍然多多，其一計劃就係拓展上游金礦開採、中游黃金批發及珠寶電子商貿，正積極向內地及蒙古等金礦公司探路，只要條件合適，就會火速行動。
內地民眾消費力強，對金飾渴求，集團首季同店銷售增長48%，目標今年內地零售生意可達20億元人民幣，加上金價強勢，令零售市場毛利率不低於25%。股東之一華懋基金看好業務前景，曾明言考慮增持。吼位跟買持中線，回報應不俗。香港資源昨收1.40元，跌0.01元。
方星俠